DILI, 29 dezembru 2023 (TATOLI)— Xefe Gabinete Kontrolu Kualidade no Komunikasaun Sosiál iha Hospital Nasional Guido Valadares (HNGV), Sara Maria Xavier, hateten, iha 2024, HNGV sei kontrolu pesti hodi prevene barrata mosu ona antes ne’e no agora mosu fila fali.
“Ami iha ona hanoin iha 2024 atu halo tan atividade kontrolu pesti, ba barata sira ne’ebé mak komesa, uluk iha tinan hirak liubá halo ona dala rua, maibé mosu fila fali ho nune’e ba oin sei halo tan limpeza kontrola ba pesti, liu- liu ba iha barrata sira iha ospitál ida ne’e,” Sara Maria Xavier informa, iha nia kna’ar fatin HNGV, ohin.
Xefe Gabinete ne’e hateten, fatór ne’ebé kauza ba barrata ne’e mak mai husi vizitór sira ne’ebé mak barak demais, no sira lori mos sira nia hahan hanesan sasoru no hahan sira ne’ebé mak mai husi uma. Entaun hahan restu sira ne’e fó impaktu hodi kria barrata iha HNGV.
“Fatór ka kauza ba barrata ne’ebé mak iha ne’e mai husi vizitór sira ne’ebé mak barak demais, no sira lori mós sira-nia hahán hanesan sasoro no hahán sira ne’ebé mak mai husi uma. Entaun, hahán restu sira ne’e fó impaktu hodi kria barrata iha HNGV. Alende ne’e, vizitór ne’ebé mak barak difikulta tebes ba (pesoál) limpeza sira halo limpeza ho di’ak no efetivu, tanba espasu ne’ebé mak klot,” nia ko’alia.
Nia dehan, sasan pasiente nian ho vizitór nian barak tebes iha informaria, entaun fó impaktu ba efetividade husi limpeza ne’e rasik.
“Tanba ne’e husu ba ita hotu atu kumpri regras iha HNGV katak, pasiente ida, família na’in ida mak hein, depois mai vizita pasiente karik tuir oráriu ne’ebé mak determina. La presiza lori sasan barak husi uma, lori de’it sasan ne’ebé mak nesesita atu labele fó impaktu ba espasu ne’ebé mak klot iha HNGV, no kauza husi pasiente ne’ebé mak barak baixa iha HNGV, “nia haktuir.
Xefe Gabinete Kontrolu Kualidade no Komunikasaun Sosiál HNGV, Sara Maria Xavier akresenta, atu asegura ida ne’e mak konsellu diretivu hasai ona karta sirkular katak, kada fulan iha limpeza jerál ne’ebé mak akontese iha inísiu semana kada fulan atu nune’e bele asegura ambiente ospitál ne’ebé mak moos, konfortavel no mós saudavel.
“Observasaun enjerál kona-ba limpeza lavandaria nian iha HNGV, durante ne’e ami haree servisu lavandaria nia la’o diak, servisu ne’e lidera no organiza husi xefe departamentu lojístika, no xefe unidade saúde ambientál, no mós ekipa sira seluk ne’ebé mak hetan kontrolu kualidade, ba iha kada infarmaria sira ne’e no unidade sira seluk nee la’o ho di’ak,” Sara rekoñese.
Nia haktuir, loroloron pesoál limpeza sira hala’o sira-nia funsaun no kna’ar husi dadersan, meiu-dia no kalan. Servisu ne’ebe mak sira halo inklui hamoos, dasa no pel haris-fatin, valeta-ku’ak, hodi asegura ambiente ne’ebé mak di’ak, seguru no saudavel ba iha pasiente sira, atu prevene infeksaun ba pasiente sira no vizitór sira ne’ebé mak mai iha estabelesimentu ospitalár públiku ne’e.
Entretantu, totál funsionariu limpeza iha HNGV hamutuk ema na’in 135, sira ne’e fahe ba kada rotasaun; iha dadeer, lorokraik no kalan. Depois kategoria limpeza, limpeza iha ospitál laran no mós halo limpeza iha área li’ur ospital nian, no jardin sira.
Jornalista: Felicidade Ximenes
Editór: Rafael Ximenes de A. Belo
