iklan

NASIONÁL, DILI, HEADLINE, SOSIEDADE SIVĺL

CNJTL lansa planu estratéjiku dalan ba reforsa lian juventude

CNJTL lansa planu estratéjiku dalan ba reforsa lian juventude

Imajen/Facebook: Dadi Magno Alves.

DILI, 28 de dezembru 2023 (TATOLI) – Conselho Nasionál Juventude Timor-Leste (CNJTL), kinta ne’e, lansa planu estratéjiku ho tema “Dalan ba reforsa lian juventude` ba tinan lima hosi 2024 to’o 2029.

Objetivu prinsipal hosi organizasaun ba iha planu estratéjiku CNJTL nu’udar plataforma diálogu ida no nu’udar organizasaun ba juventude hodi halo reflesaun ba aspirasaun joven sira, kontribui insentivu, promove no dezenvolve organizasaun juveníl, kolabora ho órgaun Estadu no Governu hodi fó pareser, promove diálogu interkámbiu entre organizasaun juveníl iha rai laran no liur, fó apoiu ba tékniku no sientífiku organizasaun juventude, fó apoiu ba organizasaun membru sira ba programa atividade sosial, ekonomia, polítika, seguransa no kultura.

Prezidente CNJTL, Maria Dady Soares Magno, hateten, CNJTL nia vizaun ba iha planu estratéjiku mak sosiedade timorense moris iha amibiente saudável, seguru, demokrátiku, independente, koezaun sosial, próspero no respeitu ba valores kulturais.

Atu konkretiza vizaun ida ne’e, Prezidente refere CNJTL aposta nia misaun importante sira hanesan hasa’e koñesimentu juventude iha prosesu hari’i dame no hametin unidade nasionál, promove valór kulturál hodi konserva identidade nasionál, promove edukasaun sívika ba futuru lideransa juventude partidu polítiku sira, formasaun profisional iha área oin-oin no hasa’e ekonomia juventude liu hosi kriasaun ekonómika no kooperativa.

“Planu estratéjia ne’e ba tinan lima nian oinsá hatu’ur ona vizaun no misaun CNJTL nian atu sosiedade foinsa’e feto no mane Timor-Leste moris iha dame no hakmatek”, dehan Prezidente CNJTlL ne’e.

Iha biban hanesan, Ministru Juventude, Desportu, Arte no Kultura, Nelio Isaac Sarmento, hateten, CNJTL hanesan parseiru Governu nian oinsá fó advokasia no bele haree ba iha kestaun sosiál foinsa’e nian iha Timor-Leste.

“Primeiru tenke haree joven sira ne’ebé seidauk maduru partisipa iha polítiku oinsa sira atu simu sira nia responsabilidade hodi aprende no fasilita joven sira seluk atu hetan esperiénsia pozitivu”, refere Ministru ne’e iha nia intervensaun.

Governante husu mós ba foinsa’e, organizasaun no sosiedade hotu hotu fó ideia krítika konstrutiva no fó solusaun ba problema ekonomia no sosiál iha rai laran.

“Buat ne’ebé sala ita dehan sala no los ita dehan los, labele ho hanoin ida gosta ka la gosta, tenke fó krítiku no solusaun”, nia sujere.

Jornaslita: Jesuína Xavier

Editór        : Florencio Miranda Ximenes

iklan
iklan

Leave a Reply

iklan
error: Content is protected !!