Korrente mota kontinua sobu ponte ligasaun Cailaco-Maliana
BOBONARO, 29 dezembru 2023 (TATOLI) – Hafoin akontese udan-boot iha loron liubá, korrente bee-mota Bulobu, kontinua sobu ponte Samutaben, suku Manapa ligasaun hosi postu administrativu Cailaco ba postu administrativu Maliana, munisípiu Bobonaro.
Ponte ne’e foin hetan reablitasaun hosi Institutu Nasionál Jestaun Ekipamentu Apoia Dezenvolvimentu Infraestrutura, Institutu Públiku (IGEADI,I.P, sigla portugés) hafoin hetan estragu iha fulan-novembru.
Notisia relevante: Ponte ligasaun Cailaco ba Maliana kotu
“Horibainrua lokraik, udan mai bee tún, sobu fila-fali ona saku ho bronjong sira-ne’ebé hatama rai-henek ne’e, agora karon sira monu hotu ba mota-laran, depois estraga tán bee ne’ebé komunidade uza,” Xefe suku Manapa, Zeferino Loco-Bere, koa’lia iha edifísiu administrasaun munisípiu Bobonaro, sesta ne’e.
Nia subliña, daudaun ne’e movimentasaun transporte públiku ho privada sei normál hela no husu Ministériu Obra Públika la halo intervensaun lalais tanba posibilidade ponte ne’e bele kotu liu fali antes ne’e.
“Kuandu akontese udan-boot nian sei monu tán to’o sorin ba liu ida uluk ne’e, tanba balu iha sinál ona, entaun komunidade labele liu no movimentu tranporte mós labele liu, sé karik sira la rezolve ho tékniku ne’ebé di’ak, entaun difikulta movimentu komunidade no estudante sira-ne’ebé mak lakleur tán atu tama ona eskola, sira iha sorin ne’e labele mai,” nia katak.
Enkuantu problema refere, Xefe suku Manapa, hato’o ona ba administrador postu administrativu Cailaco no autoridade postu ne’e kontaktu ona ba Diresaun Servisu Munisipál Obra Públika, atu enkamiña ba nasionál.
“Ami husu Ministériu Obra Públika, atu orienta tékniku sira tún dirieta mai, atu halo dezeñu detalladu, atu ponte ne’e labele sobu fila-fali, sé lae udan tún aat fali,” Xefe suku Zeferino hateten.
Enkuantu ponte refere liga mós hosi munisípiu Bobonaro ba munisípiu Ermera.
Notisia relevante: IX Governu presiza prioriza estrada urbana Maliana ba Cailaco
Jornalista: Sérgio da Cruz
Editór: Evaristo Soares Martins
