VIQUEQUE, 29 dezembru 2023 (TATOLI)- Semana ikus fulan dezenbru, Sentru saúde Uatucarbau rejista ona moras diárea ba labarik ki’ik hamutuk na’in sanolu, Xefe sentru saúde Uatucarbau, munisípiu Viqueque, Jermias Mota, informa.
“Iha fulan dezembru 2023, ba semana ikus ida-ne’e nian laran ami rejista ona kazu moras diárea hamutuk na’in 10-resin, maibé dadús ami seidauk rekolla hotu husi kada postu saúde sira-ne’ebé eziste iha suku neen. Kazu diárea ida-ne’e ami haree difirente ho fulan kotuk ba tanba kazu diárea ne’e iha, maibé rejista na’in ida dala ruma maka ema rua. Tan ne’e, ami konsidera kazu diárea iha postu Uatucarbau sei sa’e”, Jermias Mota, hateten ba jornalista sira, iha postu Uatucarbau, sesta ne’e.
Impaktu husi moras diárea, Jermias dehan, tempu agora udan monu rai nune’e ai-tahan sira hahú buras fila fali hanesan modo-tahan, depois família sira komsumu dala ruma fase la moos entaun fó ba labarik sira han maka hetan moras diárea.
“Alende modo tahan, impaktu seluk maka dala ruma ita so’e fo’er arbiru, entaun udan tau lori fo’er sira-ne’e lori tama to’os-laran hodi kona modo, ita ku’u modo depois fase la moos, maka halo modo de’it, mosu moras diárea,” nia esplika.
Kona-ba tratamentu nia dehan, atu halo tratamentu ba moras diárea fasil ba sira-ne’ebé sente moras tenke ba fasilidade saúde hodi hetan tratamentu husi pesoál saúde sira.
“Tanba ita-nia estoke ai-moruk iha sentru saúde agora daudaun sufisente hodi halo tratamentu ba ita-nia abitante sira. Ami mós husu abitante sira halo intevensaun ba moras diárea tanba ami halo ona sensibilizasaun ba abitante sira atu kosumu modo; karik tenke fase moos maka konsumu, bee tenke nono maka hemu atu ita bele halo prevensaun ba mora diárea”, pesoál saúde ne’e hakle’an.
Alende ne’e, nia dehan, tempu agora udan nune’e sentru saúde Uatucarbau trasa ona planu ba halo prevensaun moras dengue.
“Ami trasa ona planu ba halo prevensaun ba moras dengue nune’e ami halo sosializasaun kona-ba prevensaun moras dengue nian ba ita-nia abitante sira. Atu halo prevensaun ba moras dengue, abitante sira tenke limpeza ida-idak nian hela fatin, hakoi lata mamuk sira, halo ku’ak roda aat sira, atu udan karik bee labele nalihun iha laran tanba susuk ne’e moris iha bee nalihun sira no inan sira kuru bee tau iha dapur karik tenke doku balde nian matan”, nia subliña.
Nune’e, profisionál saúde ne’e husu, abitante sira husi postu Uatucarbau tenke halo limpeza valeta sira atu bee labele nalihun atu nune’e susuk labele moris iha bee nalihun sira-nia laran.
Tuir dadús husi serbisu saúde munisúpiu Viqueque ba tinan 2023 rejista ona kazu moras dengue hamutuk 36 ne’ebé maioria labarik husi idade 1 to’o 8.
Jornalista : Vitorino Lopes da Costa
Editór : Rafael Ximenes de A. Belo
