VIQUEQUE, 31 dezembru 2023 (TATOLI)-Infraestutura ba dalan Estrada nasionál nu’udar importante ba povu Viqueque hodi asesu nune’e simu tinan foun bele simu novidade foun ba konstrusaun dalan Lugatohi mosu erosaun lokaliza iha suku Caraubalo, postu Viqueque Vila, munisípiu Viqueque ne’ebé tempu udan mosu bei-beik erosaun.
Dalan Lugatohi kotu iha tinan ida ona ba kotuk, dalan ne’e nu’udar dalan públiku ne’ebé lokaliza iha kapitál munisípiu Viqueque ne’ebé liga ba postu tolu Uatulari, Uatucarbau no Lacluta
Iha 21 janeiru 2022 Unidade Tránzitu munisipiu Viqueque identifika akontesementu karreta marka Hilux ida hetan asidente monu iha rai-ko’ak laran iha área Lugatoi, suku Caraubalo, postu administrativu Viqueque Vila, munisipiu Viqueque.
Nune’e mós Unidade tránzitu Viqueque kontaktu ba empreza hadi’a dalan hodi ba dada-sai karreta ne’ebé monu iha rai-ko’ak laran.
Tuir krondlojia, asidente ne’e akontese bainhira vítima sira mai hosi Dili atu ba postu administrativu Uatulari, maibé to’o iha dalan Lugatoi nian hasosru motorizada ida, depois sira sees ba dalan ninin mak roda kotuk tama uluk rai-ko’ak mak karreta monu no duir an ba rai-ko’ak laran.
Iha asidente ne’e, ema na’in-haat mak iha karreta laran, na‘in-rua mak hetan kanek maibé kanek ladun grave no na’in-rua kabun kanek. Vítima na’in-rua hetan ona tratamentu intensivu.
Akontesementu ne’e akontese iha sesta (20.01), maizumenus akontese iha tuku 21h00, iha suku Caraubalo tanba efeitu hosi rai-monu iha Estrada área Lugatoi ne’ebé rezulta karreta Hilux ho xafa matrikula A,27105 ho kor metal monu tama ba rai ko’ak
Iha loron 29 setembru 2022 dalan públiku dirasaun Lugatohi, iha suku Caraubalo, postu administrativu Viqueque, mosu erosaun rai halai hodi halo dalan kotu, nune’e difikulta movimentu transporte.
Akontesementu rai-halai maizumenus iha tuku 14:00, iha kuarta (29/09), nune’e Polísia Nasionál Timor-Leste (PNTL) dada. Tali Polísia iha área akontesimentu hodi transporte sira liu ho kuidadu.
Depois dalan ne’e, kotu transporte ki’ik sira hanesan bus, anguna, truck no motorizada sei iha espasu naton hodi liu, maibé kareta fuzu sira labele tanba bele fó risku.
Iha loron 29 setembru 2022 Administradór munisípiu Viqueque, Januário Soares ‘Bolly’, halo ona koordenasaun ho Ministériu Obra Públika (MOP) atu hadi’a dalan Lugatoi, iha suku Caraubalo, postu administrativu Viqueque, ne’ebé besik kotu.
Nune’e ekipa husi MOP halo peskiza iha dalan Lugatoi no sei halo normalizasaun no autoridade sira koordena rai-na’in sira hodi uza rai-mutin aterru ba dalan Lugatohi.
Iha 10 marsu 2023 Empreza internasionál China Overseas Engineering Group (COVEG) Co, Ltd, halo normalizasaun ba estrada Lugatohi iha suku Caraubalu, postu Viqueque-Villa, munisipiu Viqueque.
Empreza ne’e aterru di’ak tiha dalan ne’e atu labele difikulta ba movimentu transporte públiku sira Empreza COVEG aterru ho rai-mutin kahur ho rai-henek hodi normaliza dalan refere.
Enkuantu parte okos empreza uza ai maka forma iha okos hodi satan netik rai, atu rai labele halai ba mota laran.
Tanba durante ne’e rai parte Lugatohi sempre monu beibeik ba mota. Ho ida-ne’e maka empreza uza ai hodi satan rai halai no suru sai tau dodok sira ne’ebé maka aterru rai mutin tan. Normalizasaun ne’ebé empreza halo iha tempu udan rai sei kontinua halai tanba laiha infraestutura di’ak balan Lugatohi.
Iha 22 juñu 2023 admintrasaun Viqueque loke konkursu públiku hodi loke dalan alternativu ida iha área mota sorin kuaze kilométru haat, hahú aldeia Buanurak suku Uabubu, postu Ossu ba mosu iha eskola sekundáriu 4 setembru Viqueque Vila.
Konkursu loke dalan alternativu ne’e munisípiu Viqueque hetan aprovasaun hosi Ajénsia Dezenvolvimentu Nasionál, Instituto Públiku (ADN, I.P), ho tipu loke Estrada foun ne’e aterru uluk hodi uza depois ba oin. Distánsia hosi aldeia Buanurak to’o suku Caraubalu ho totál 0+000+4-320.
Iha 06 setembru 2023 projetu loke Estrada foun nu’udar dalan alternativu ba Lugatohi manán husi empreza Belas Lari Unipesoal Lda hosi aldeia Buanurak to’o suku Caraubalu ho totál 0+000+4-320.
Dalan foun ne’e sei liga mós ba futuru ospital munisipál Viqueque ne’ebé antes ne’e abitante sira oferese ne’ebé lokaliza hotu iha mota sorin inklui mós futuru edifísiu munisípiu Viqueque.
Molok loke dalan foun, autoridade munisípiu Viqueque halo koordenasaun entre rai nain sira no autoridade suku Caraubalu atu abitante sira bele asesu ba dalan foun. Dalan foun ne’ebé loke ona ne’e ho naruk kilométru haat hahú husi Buanurak to’o ensinu sekundáriu jerál (ESJ) sekundáriu 4 setembru suku Caraubalo, ho kustu estimativu $267.653,39 durasaun servisu fulan-tolun.
Maske autoridade munisípiu Viqueque esforsu loke ona dalan alternativu kilometru haat, maibé daudaun ne’e seidauk tau aspaltiku nune’e tempu udan sei kontinua difikulta ba tranporte públiku sira. Esperansa tinan foun Governu bele tau-atensaun ba kondisaun strata públiku sira-ne’ebé iha tempu fó ameasa ba abitante sira liu liu munisípiu Viqueque ba dalan Lugatohi no dalan alternativu.
Jornalista : Vitorino Lopes da Costa
Editór : Rafael Ximenes de A. Belo
