iklan

NASIONÁL, EKONOMIA, DILI, HEADLINE, POLÍTIKA

Ramos Horta husu Governu aselera dezenvolvimentu nasionál

Ramos Horta husu Governu aselera dezenvolvimentu nasionál

Prezidente Repúblika, José Ramos-Horta. Imajen Tatoli/Egas Cristóvão

DILI, 31 dezembru de 2023 (TATOLI) – Prezidente Repúblika José Ramos Horta, husu Governu aselera prosesu dezenvolvimentu nasionál nune’e reforsa Timor-Leste nia adezaun bá Asosiasaun Sudeste Aziátiku (ASEAN).

Xefe Estadu hateten tinan 2024 tinan ida desididu no importante atu Timor-Leste bele adere ba ASEAN iha 2025, tanba ne’e nia husu ba Governu atu fó planu prioridade.

“Tan ida-ne’e Governu tenke kumpre nia programa hadi’a infraestrututa aeroportu internasionál Nicolau Lobato, Dili, dijitalizasaun komunikasaun ho kabu submarinu mai husi Austrália atu aselera ita-nia konetividade komunikasaun katak ajuda kombate korrupsaun ho dijitalizasaun iha aeroportu, migrasaun no alfándega, portu iha terras propriedade no iha fatin hotu-hotu”, José Ramos Horta, refere iha nia mensajen liuhosi diskursu iha Komemorasaun loron nasionál eroi iha 31 dezembru, iha rotunda Nicolau Lobato, Dili.

Prioridade ba nia prezidénsia no Governu mak fó atensaun ba ASEAN ne’ebé mehi kedas hahú iha 1974.

Nune’e mós investe iha agrikultura no edukasaun infantil.

Liu hosi dezenvolvimentu nasionál ema hotu bele fó onra ba eroi sira hotu ne’ebé mate ba rai ida-ne’e ho sira-nia sakrifísiu liuhosi dalan oioin hanesan gerilla, klandestina no diplomasia hahú hosi 1974 to’o mai ukun rasik aan.

“Ho ida-ne’e ita bele fó onra Prezidente Nicolau Lobato no Francisco Xavier do Amaral no eroi no vítima sira hotu ne’ebé lakon moris ba libertasaun nasionál no pátria dalan ida ba dame no demokrátiku ba ita hotu,” nia hateten.

Ramos Horta husu ba Governu atu ezekuta programa didi’ak atu nune’e aposta ba dezenvolvimentu nasionál ba iha setór infraestrutura hanesan aeroporto internasionál, agrikultura no hakmaan burokrasia atu investimentu bele tama iha rai laran.

Atu dezenvolvimentu ne’e lao ho di’ak, Prezidente Repúblika mos sujere ba entidade hotu atu kria unidade nasionál iha rai laran.

“Tan ne’e ita kontinua hakle’an dame iha komunidade iha rai laran. Hotu-hotu, Prezidente Repúblika, Parlamentu Nasionál, Governu, opozisaun partidu sira, sosiedade sivíl, setór privadu no ita-nia parseiru internasionál sira,” Chefe Estadu fó hanoin.

Iha fatin hanesan, eis-governante Rogério Lobato hateten, Estadu no sosiedade timorense fó rekoñesimentu maior ba nia eroi no veteranu sira.

“Ha’u sente katak, pratikamente ema hotu-hotu iha Timor sempre respeita ita-nia matebian sira-ne’ebé fó sakrifísiu vida, tanba vida ne’e boot liu. Povu Timor-Leste sempre rekoñese ida-ne’e,” nia rekoñese.

Nia mos sujere ba ema hotu atu kria unidade nasionál atubele kontinua dezenvolvimentu nasionál.

Nia mós husu ba Governu atu investe iha setór edukasaun hodi bele aselera dezenvolvimentu nasionál.

“Ita seidauk hetan dezenvolvimentu, tanba ita-nia matenek seidauk barak. Ita iha matenek, la depende ba ema seluk atu dezenvolve ita-nia rai. Edukasaun sai ne’e sai preokupasaun boot liu,” nia hateten.

Tuir nia, investe iha edukasaun importante no valoriza profesór sira, tanba edukadór sira mak investe iha rekursu umanu.

Jornalista: Jesuína Xavier
Editór: Evaristo Soares Martins

iklan
iklan

Leave a Reply

iklan
error: Content is protected !!