DILI, 03 janeiru 2024 (TATOLI) – Ajénsia Nasionál Avaliasaun no Akreditasaun Akadémika (ANAAA) nia orsamentu ba tinan ne’e hamutuk $921.678 no husi totál ne’e aloka rihun $350-resin ba reabilitasaun edifísiu, nune’e bele fasilita di’ak liután serbisu ajénsia nian iha futuru.
“Ita sei reabilita edifísiu iha tinan ida ne’e tanba atu ko’alia kona-ba kualidade ANAAA, tenke iha duni edifísiu ne’ebé propriu, nune’e bele garante ANAAA nian serbisu sira,” Diretór-Ezekutivu ANAAA, Nilton Paiva, hatete iha Balide.
Durante ne’e ANAAA iha espasu ne’ebé kloot no ninia edifísiu mós iha konsidaun ladún di’ak no dalabarak prejudika serbisu sira, tanba ne’epresiza atu hetan reabilitasaun mesmu nia espasu ki’ik, maibé tenke hadi’a nune’e bele enkoraja nafatin funsionáriu sira hala’o sira-nian knaar.
Bainhira ANAAA hetan ona espasu ne’ebé sufisiente, bele mellora ninia kualidade tanba ajénsia ne’e presiza atu dijitaliza nia dadus sira. “Kuandu iha ema ruma presiza atu asesu dadus sira bele liu de’it husi website tanba iha ona plataforma ne’ebé maka kria. Ne’e duni, presiza iha espasu di’ak atu responde ba preokupasaun sira ne’e”, hatete.
“Ita halo ona karta ba ministeriu rua atu hetan koñesimentu nune’e sira aseita maka ita foin hahú reabilitasaun, tanba área ne’e Ministériu Edukasaun nian no MESSK mak ita-nian superiór, tan ne’e sira tenke hatene”, afirma.
Orsamentu 2024 ba ANAAA aloka ba kategoria saláriu no vensimentu $410.143, bens no servisu $153.385, transferénsia públika laiha, kapitál menór $8.150 no kapitál dezenvolvimentu $350.000. Rekorde katak, iha tinan kotuk alokasaun verba ba ANAAA iha de’it $442-resin.
Ministru Ensinu Superiór, Siénsia no Kultura, José Honório Jerónimo, dehan ANAAA nu’udar ajénsa únika Estadu ida ne’ebé ninia serbisu atu halo avaliasaun no akreditasaun ba Institutu Ensinu Superiór Públiku no Privada sira no Governu iha obrigasaun atu tau orsamentu ida sufisiente hodi apoiu instituisaun ne’e atu hala’o ninia knaar ho adekuada.
Jornalista: Tomé Amado
Editora: Maria Auxiliadora
