DILI, 03 janeiru 2024 (TATOLI)-Banku Nasionál Komérsiu Timor-Leste (BNCTL) fó ona kreditu ba veteranu 8.500-resin, Ministru Asuntu Kombatente Libertasaun Nasionál (MCLAN-sigla portugés), Gil da Costa Monteiro “Oan Soru”, relata.
“Husu ba emprezáriu sira, karik katuas veteranu ida ka rua hakbesik-an ba imi, fó hanoin ba sira atu nune’e sira mós bele hakat ba oin, tanba sira hahú polítika ba osan, maibé sira seidauk iha koñesimentu ne’ebé di’ak hodi jere oinsá osan dolar ida bele transforma dolar rua,” Oan Soru hateten iha nota, ne’ebé Agência Tatoli, kuarta ne’e.
“Nune’e agradese mós ba BNCTL tanba BNCTL bele fó ona kréditu ba veteranu 8.500-resin, maibé kréditu ne’e ba konsumu konsultivu de’it la’os ba investimentu. Tanba sira rasik seidauk iha koñesimentu kona-ba investimentu, nune’e persiza tulun hosi empreza sira hodi oinsá jere osan,” governante ne’e agradese.
Membru Governu Konstitusionál da-sia ne’e hateten, oras ne’e dadaun osan ne’ebé veteranu sira kréditu hamutuk miliaun $52, karik ida-ne’e kreditu ida bo’ot tebes, maibé presiza atu hatene nia rezultadu didi’ak.
“Nune’e husu ita hotu-hotu hamutuk fó apoiu ba sira, tanba miliaun $52 ne’e mós dalaruma namkari iha Timór. Osan ne’e la sai, razaun saida mak osan ne’e la sai tanba sira ne’e 99,5% sira ne’e laiha pasaporte tanba ne’e mak osan ne’e la sai”, Oan Soru hateten.
MCLAN dehan, negósiu ne’ebé kiik ka bo’ot ka médiu basta sira-nia osan dolar ida ka 50 sentavu monu iha ne’ebá tanba miliaun $52.
“Ha’u hato’o lia-menon ba emprezáriu sira katak sai emprezáriu ida iha responsabilidade ne’ebé bo’ot, ne’ebé ita hotu iha responsabilidade, atu kontribui ba dezenvolvimentu ekonomia ba ita-nia nasaun, ba ita-nia povu no ba ita-nia jerasaun tuirmai”, Oan Soru hateten.
Ministru Oan Soru hatutan, ida-ne’e bainihira atribui sertifikadu ba empreza sira. Empreza sira-ne’e maihosi munisípiu 12 inklui Rejiaun Administrativa Espesiál Oé-cusse Ambeno (RAEOA),
Iha biban, Ministru Komérsiu Industria, Nino Pereira kontinua husu ba empreza sira-ne’ebé mak simu ona sertifikadu atu kontinua sira-nia servisu, hodi habelar sira negósiu hodi nune’e ajuda fó servisu ba timoroan.
Jornalista: Osória Marques
Editór: Rafael Ximenes de A. Belo
