iklan

DILI

MSSI: Prizaun fatin halo reflesaun no rekonsiliasaun pesoál

MSSI: Prizaun fatin halo reflesaun no rekonsiliasaun pesoál

Ministra Solidariedade Sosial no Inkluzaun, Verónica das Dores. Imajen Tatoli/Egas Cristóvão

DILI, 03 janeiru 2024 (TATOLI)-Entre tinan tuan no foun (2023-2024), Ministra Solidariedade Sosiál no Inkluzaun (MSSI), Verónica das Dores hamutuk ho Vise-Ministra Céu Brites, inklui nia funsionáriu sira, vizita prizioneiru sira, iha Prizaun Becora, Dili.

Ministra Verónica das Dores, iha ámbitu vizita ne’e, hateten ba prizioneiru sira katak, prizaun la’ós fatin fó kastigu maibé fatin atu halo reflesaun no rekonsiliasaun pesoál.

“Ha’u sempre dehan nune’e, imi halo aat imi la manan buat ida, mós lalakon buat ida. Maibé se imi halo di’ak, imi sei manan bensaun. Ha’u konsiente katak, ita hotu-hotu ne’ebé moris iha kalohan-nia okos la sees husi sala, maibé la’ós ema hotu-hotu hakarak halo sala. Tanba ne’e, bainhira halo sala ona, tau ain-tuur rua ba rai husu ba Nai fó perdaun, no importante liu labele repete halo sala,” MSSI dehan iha nota ne’ebé Agência Tatoli, asesu, kuarta ne’e.

“Kuandu ita tauk Maromak, maka ita mós ta’uk halo sala. Maibé labele ta’uk Maromak iha ibun-tutun de’it, se lae diabu tenta, bele monu fila-fali ba sala. Tan ne’e, ta’uk Nai Maromak ho fuan no laran, atu nune’e tentasaun dook husi ita,” governante ne’e hateten tan iha nota ne’e.

Kazu iha Timor-Leste, membru governu ne’e hateten, kazu akontese iha Timór laran tomak ho natureza kazu oioin, maibé kazu rua mak ninia nível gravidade ne’e boot liu, maka kazu violasaun ba minoridade no kazu oho ema.

Nune’e Ministra ninia mensajen ba komunidade prizaun Becora, atu aban bainrua reintegra ona ba família maka ema ruma halo provokasaun, labele halo reasaun, maibé hasees aan tiha no liga ba polísia mak halo atuasaun.

“Husu ba komunidade prizaun Becora atu banati tuir Maromak-Nia liafuan iha Biblia hatete, ita tenke fó perdaun ba malu hitu nulu dala hitu (70 dala 7). Tanba matenek no teknolojia bele avansadu to’o iha ne’ebé de’it, maibé labele muda rai no lalehan, so Espíritu Santu Maromak nian mak bele muda buat hotu, nune’e tenke aprende husi pasadu, hodi hadi’a buat ruma ba futuru,” Ministra rekomenda.

Iha oportunidade ne’e, Diretór Prizaun Becora, Januario Freitas agradese MSSI ba vizita no relata katak totál prizioneiru sira iha Prizaun Becora 406 kompostu hosi prizaun preventiva 64 no kondenadu hamutuk 342.

“UNICEF mak durante ne’e suporta ba prizioneiru juvenile sira iha Prizaun Becora.  Iha mós formasaun ba sira ne’ebé mai husi madre sira. Sira aprende formasaun kona-ba komputadár, lian-portugés no inglés no mós formasaun kona- ba soldadura,” Diretór Januario Freitas haktuir.

Ezekutivu ne’e mós hatete katak semana-semana padre kapelaun no madre sira mai iha Prizaun Becora fó formasaun ba prizioneiru sira liu-liu prizioneiru juvenil sira.

“Semana ida iha prizaun ne’e halo misa dala rua. Ida ne’e atu muda sira-nia mentalidade no sira-nia hahalok ne’ebé sira halo to’o iha fatin ida ne’e,” nia informa.

Nia mós hato’o feliz Natál no feliz ano novo ba família-boot prizaun no prizeneiru sira hotu.

Entretantu, MSSI alende vizita prizioneiru sira iha Prizaun Becora, tuir nota ne’e katak antes ne’e MSSI mós hala’o ona vizita ba iha Prizaun Covalima, Prizaun Gleno (Ermera).

Vizita MSSI iha estabelesimentu prizionál Becora ne’e, hato’o Ksolok Natál ba sira tanba sira bele hakat liu ona loron atus tolu neen nulu resin lima (365).

Akompaña Ministra no Vise-Ministra iha reflesaun Natál ne’e, Diretór Jerál Protesaun Sosiál, Floréncio Pina Dias Gonzaga, Diretór Nasionál Inkluzaun no Reinsersaun Komunitária, Amandio Amarál Freitas.

Jornalista: Osória Marques

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!