DILI,03 janeiru 2023 (TATOLI)– Prezidente Autoridade Portuáriu Timor-Leste Institutu Públiku, (APORTIL I.P), Felisiano da Costa Correia, ró-ahi Berlin Ramelau retoma atividade operasaun rota Dili bá Oé-Cusse.
“Berlin Ramelau hala’o manutensaun durante fulan ida iha Surabaya-Indonézia konta ho viajen fulan ida resin. Antes sai hosi ne’ebá, halo tiha teste no to’o iha Portu Dili mós autoridade portuáriu hala’o inspesaun molok halo operasaun iha loron 29 semana kotuk”, Prezidente Felisiano da Costa Correia ba Tatoli, iha Portu Díli.
Nia esplika ró-ahi Berlin Ramelau sai hosi Surabaya-Indonésia iha loron 21 dezembru no to’o iha Timor-Leste iha loron 25 dezembru.
Autoridade portuáriu hala’o inspesaun iha loron 27 no APORTIL fa’an ona billete vianjen ba pasajeiru iha loron 28 hodi bele halo viajen iha 29 dezembru.
Manutensaun ró-ahi Berlin Ramelau la’o tuir kontratu entre empreza ho APORTIL katak reparasaun durante loron 30 no viajen loron 15 hodi ba no fila. Nune’e ró-ahi Berlin Ramelau agora iha hela Oé-cusse no fila ka sai ne’ebá ho diresaun mai Dili.
Ró-ahi Berlin Ramelau sai hosi Timor-Leste ba Surabaya Indonézia iha loron 11 novembru 2023 hodi hala’o manutensaun ho totál orsamentu hamutuk liu rihun $390.
Jornalista : Jesuína Xavier
Editór : Florencio Miranda Ximenes
