Horta-Xanana louva maturidade povu nian perante Natal-Tinan Foun

DILI, 04 janeiru 2024 (TATOLI) – Prezidente Repúblika (PR), José Ramos Horta no Primeiru- Ministru (PM), Kay Rala Xanana Gusmão louva no apresia ba maturidade povu Timor-Leste nian ne’ebé selebra Natal no Tinan Foun ho domin ho dame.

“Hato’o parabéns ba povu Timor-Leste tomak liuliu ba joven sira no ita-nia seguransa sira hotu hanesan Falintil-Forsa Defeza Timor-Leste (F-FDTL), Polísia Nasionál Timor-Leste (PNTL) ne’ebé fó seguransa di’ak tebes durante selebrasaun Natal no Tinan Foun, la iha konflitu, ida- ne’e di’ak tebes ba ita”, Horta dehan ba jornalista sira iha Palásiu Prezidensiál, ohin.

Iha fatin hanesan, Xefe Governu Kay Rala Xanana Gusmão, sente kontente tanba povu hotu iha ona maturidade ne’ebé di’ak hodi kontribui ba pás iha nasaun ne’e.

“Ita hatene katak durante natal no tinan foun, ita la iha konflitu iha Dili laran no fatin seluk, liuliu Arte Marsiál sira, ida-ne’e hatudu duni juramentu ba ita-nia membru PNTL no F-FDTL sira iha duni valór no influénsia tebes ba joven sira”, Xanana afirma.

Nia haktuir, selebrasaun tinan foun iha Portu Dili, la’o iha ámbitu hakmatek, joven barak kontente no la kria violénsia bam alu.

“Ida-ne’e mak Estadu hato’o apresiasaun ba joven sira hotu, mantein nafatin hanesan ne’e atu ita bele hadia ita-nia nasaun ne’e ba oin, fiar katak iha tinan ida-ne’e ba oin ema hotu hakribi ona violénsia hodi haree de’it ba ida-idak nia moris no dezenvolvimentu nasaun nian”, konklui.

Jornalista: Hortencio Sanchez

Editór : Zezito Silva