PPN-Kardeál diskute hamosu lei liberdade relijioza
DILI, 04 janeiru 2024 (TATOLI)- Prezidente Parlamentu Nasionál, Maria Fernanda Lay ho estrutura meza, kinta ne’e hasoru malu ho Kardeál Arkidoseze Metropolitana Dili, Dom Virgílio do Carmo da Silva SDB, hodi ko’alia atu hamosu lei liberdade relijioza.
PPN, dehan PN iha programa vizita ba bispu iha dioseze tolu ne’ebé hahú ona iha Maliana no ohin ho Kardeál iha Dili no tuir planu sei hasoru malu mós ho bispu dioseze Baucau
“Ko’alia asuntu importante liga ho nasaun ne’ebé tuir ami-nia hanoin iha prioridade tebes para ko’alia no mós konsulta ho igreja liliu ho ita-nia bispu iha dioseze tolu ne’e hodi bele hetan input saida mak ami presiza hanesan Parlamentu halo serbisu hamutuk ho igreja no Governu hodi bele produs lei ou asuntu balun liga ho situasaun iha ita-nia rai laran. Ida mak liberdade relijiaun, ida ne’e ita tenke regula tanba nasaun seluk mós iha,” Prezidente PN, Maria Fernanda Lay, hateten ba jornalista sira hafoin sorumutu iha Lesidere.
Nia dehan, lei ne’e komforme hetan informasaun husi bispu rua katak, lejislasaun ne’e iha ona hanoin maibé sei konsulta ho instituisaun seluk no parte PN hanoin ida ne’e importante hodi regula ita-nia instituisaun relijiozu sira iha ita-nia rai.
Kardeál Arkidoseze Metropolitana Dili, Dom Virgílio do Carmo da Silva SDB, hateten loos duni vizita ne’e inisiativa PN hodi aprezenta preokupasaun ne’ebé iha PN ninian no sai mós preokupasaun komun igreja ninian, liliu haree liu ba asuntu liberdade relijioza.
“Lei liberdade relijioza ne’e kuaze tinan ruma ona ne’ebé ami hahú prepara bainhira ita-nia maktoban Dom Basílio sei moris ami hahú prepara ona, depois lori konsulta maske seidauk lori ba Parlamentu, maibé hahú ona iha ministériu anteriór ami hahú ko’alia ona no agora daudaun sei hadia fila-fali hodi aprezenta fali ba Ministru Justisa atu bele haree fila-fali kona-ba ida ne’e, ita hein bele lori ba oin, haree sira-nia preokupasaun no sai mós hanesan uma-reda nia preokupasaun”Nia dehan .
Tuir, Kardeál, tanba hanesan baibain dehan uma kreda ho Estadu ita servi povu ne’ebé hanesan no povu ida ne’e mak sarani no povu ne’e mak timoroan ne’ebé ho buat ne’e bele haforsa liutan. Tan ne’e, pontu ne’ebé importante liu mak ko’alia kona-ba lei liberdade relijioza.
Nia esplika, konteúdu lei liberdade relijioza mak dahuluk hanesan ita hotu hatene ita-nia Estadu ne’e iha tinan 2015 ho Vátikanu asina dokumentu ida hanaran konkordata ne’e hatuur buat lubun ida ne’ebé lei internasionál hatudu kooperasaun ida ne’ebé ita-nia Estadu asina.
Iha ámbitu ida ne’e nia laran halo mós lei lubun ida atu haforsa liu tan ida ne’e, no haree uituan iha ita-nia rai no ita hatene ita ne’e maiória Katólika estatístika foin daudaun hatudu 96.5%, ida ne’e orgullu timoroan hotu-hotu nian, maibé ita hatene iha relijiaun barak ne’ebé tama mai ita-nia rai-laran, entaun iha fatin hotu-hotu iha lei ida hodi bele regula bainhira relijiaun ida tama hakarak halo ninia igreja ne’e iha ne’ebé, mai husi ne’ebé no mai Timor-Leste nia ema na’in hira mak iha hodi loke igreja iha ne’e.
“La’ós tama tiha mai mak ba bolu sarani ida ne’e fó osan obriga sarani ida ne’e no tama vizita fahe ida ne’e ba ema hotu, nune’e nu’udar nasaun demokrátika ita tenke iha lei ida, nasaun demokrátiku nakloke ba buat hotu livre, maibé bele tama iha lei atu regula.
“Dalabarak ema barak mai loke eskola internasionál iha ita-nia rai depois se mak eskola iha ne’eba hotu-hotu tenke tama iha relijiaun a no b, hanoin eskola ne’e nakloke ba ema hotu se de’it hakarak ba eskola bele ba eskola, maibé la’ós tanba eskola ida ne’e entaun eskola iha ne’e tenke tama iha relijiaun ne’e, ida ne’e mós ita lei tenke dehan buat sira hanesan ne’e regula buat sira ne’e,” nia hateten.
Jornalista: Nelson de Sousa
Editór: Rafael Ximenes de A. Belo
