DILI, 04 janeiru 2024 (TATOLI)- Kardeál Arkidoseze Metropolitana Dili, Dom Virgílio do Carmo da Silva SDB, nafatin apela ba timoroan hotu ho tinan foun 2024 atu hakat ba oin ho hakarak ida de’it katak Timor-Leste sai fatin ne’ebé timoroan bele hatene hadomi, respeita no respeita malu hodi kria dame iha rai-laran.
Notísia relevante: https://tatoli.tl/2023/12/28/kazu-saburai-suspeitu-nain-haat-entrega-aan-ona-ba-polisia/
Tuir Kardeál, katak krime ne’ebé mosu iha ámbitu Natál no tinan foun liu ba daudaun dalaruma mai husi hemu tua barak, ikusmai kria violénsia ne’ebé iha ita nia rai-laran hanesan ita rona akontese, maske la’ós barak maibé violénsia sei mosu nafatin.
“Maske Natál no tinan foun liu ona, mai ita husik kultura baku-malu no ódiu-malu ho oho-malu nian ka sadik-malu ninian mai ita husik buat tuan nian agora koko hakat ba tinan 2024 konvida ita família, joven ita hakat ba oin ho hakarak ida de’it Timór sai fatin ne’ebé timoroan bele hatene hadomi no respeita malu ho perdua malu, ida ne’e de’it mak bainhira ita ko’alia kona-ba dame,” Kardeál Dom Virgílio do Carmo da Silva, hateten ba jornalista sira iha Lecidere, kinta ne’e.
Tanba progresu dezenvolvimentu iha rai-laran atu iha mak tenke iha pás, nune’e ho tinan foun 2024 tinan grasa nian importante tebes ba timoroan hotu atu kolabora ba pás.
Tanba unidade iha rai ida ne’e depende ba ita hotu hahú hosi kiikoan, katuas, joven responsável ba ida ne’e.
“Ne’eduni, husu mai ita hotu hakaas aan atu kontribui ba iha pás, ida ne’e mak hakarak mensajen dala ida tan ba 2024 nian ba timoroan hotu-hotu,” líder relijiozu ne’e apela.
Kardeál apela mós ba joven sira, “Haree estuda, tanba edukasaun xave hadi’a ita-nia rai no ita-nia an, ne’eduni mai ita kolabora fó an atu estuda, la’ós ho violénsia mak ita rezolve problema, hodi estuda ho edukasaun mak ita bele kontribui hodi harii ita-nia rai”.
Jornalista: Nelson de Sousa
Editór: Rafael Ximenes de A. Belo
