DILI, 24 Juñu 2026 (TATOLI)–Komunidade Musulmana Timor-Leste hato’o sentida kondolénsia kle’an ba família Antigu Prezidente Repúblika, Francisco Guterres “Lú Olo” no konsidera katak ho falesimentu eis gerrilleiru ne’e nu’udár perde boot ida ba povu no nasaun Timor-Leste.
Nune’e, Prezidente Konsellu Fundasaun An’nur Timor-Leste, Abdullah Said Sagran hateten ohin loron la’ós família saudozu nian de’it mak sente triste, maibé timoroan hotu-hotu mós sente laran moras tanba lakon líder no eroi ida-ne’ebé sai ezemplu ba jerasaun foun sira.
“Ohin loron ita hotu sente triste. La’ós família de’it, maibé sidadaun hotu-hotu. Ami Komunidade Musulmana Timor-Leste hato’o ami-nia profunda sentida kondolénsia ba família Saudozu Francisco Guterres Lú Olo,” Abdullah ba jornalista sira iha rezidénsia Saudozu Lú Olo, Faról, Kuarta ne’e.
Nia hateten mós katak komunidade ne’e reza ba família tomak atu nafatin iha pasiénsia no forsa atu simu desizaun Maromak nian.
Tuir nia, maski Saudozu Lu-Olo husik ona mundu ne’e, maibé valór no ezemplu sira-ne’ebé nia husik hela sei nafatin moris iha povu nia laran, liuliu kona-ba lideransa, umildade no komportamentu di’ak.
“Nia bele ba ona, maibé ezemplu ne’ebé nia husik hela ba ita ne’e boot tebes. Ita haree nia nu’udár líder ida-ne’ebé hakruuk, nonook no respeitu ema hotu. Ida-ne’e sai lisaun importante ba jerasaun sira iha futuru,” nia hateten.
Komunidade Musulmana Timor-Leste ramata ho orasaun ba alma saudozu no mós ba família atu iha korajen no pasiénsia iha tempu lutu ida-ne’e.
Jornalista: Osória Marques
Editór: Xisto Freitas da Piedade
