DILI, 28 dezembru 2023 (TATOLI)- Suspeitu sira ho insiál P, S, F no insiál B ne’ebé molok ne’e hamutuk ho suspeitu JB baku vítima Novelino Borges iha motór leten iha área Holsa Suku Saburai, Postu Administrativu Maliana, Munisipiu Bobonaro, entrega aan ona ba polísia.
Suspeitu nain haat ho insiál P, S, F,no insiál B, iha kuart, 27/12, loraik tuku 18:00 entrega aan ba polísia Unididade Patrollamentu Fronteira (UPF) postu Lontama-Bobonaro.
Nune’e UPF kontaktu kedan ba iha Komandu PNTL Munisipiu Bobonaro hodi foti suspeitu refere hodi kontinua ba prosesu investigasaun.
“Hakarak informa ba públiku katak, horisehik PNTL detein ona suspeitu ida ho inisiál JB no agora dadaun detein ona iha sela detensaun Komandu PNTL Munisipiu Bobonaro.Enkuantu suspeitu nain haat seluk entrega aan ona ba Unididade Patrollamentu Fronteira (UPF) postu Lontama Munisipiu Bobonaro,”refere nota ne’ebe asesu hosi Komandu Jerál PNTL, kinta ne’e.
Rekorda fali katak suspeitu JB, P, S, F no insiál B halo agresaun fiziku hasoru vítima Novelino Borges akontese iha loron segunda (25/12) ne’e iha oras 11:00 dader bainhira vítima Novelino Borges nia alin inklui nia avó feto ho motór marka Mio Beat ida halai iha dalan Saburai nian, derepente joven nain lima taka oin metin ataka vítima Novelino Borges, hodi halo agresaun fiziku (baku) hasoru vítima Novelino Borges, to’o tanis maske iha motór leten.
Suspeitu sira nia asaun ne’e virál iha mídia sosiál Facebook no depois dekontesimentu vítima sira ba hato’o keixa ba Komandu PNTL Bobonaro.
Notisia Relevante: PNTL detein ona autór ida ne’ebé taka oin baku ema iha dalan área Saburai
Jornalista: Natalino Costa
Editór : Florencio Miranda Ximenes
