Tinan ne’e, Governu prioriza programa empodera ekonomia feto
DILI, 04 janeiru 2024 (TATOLI) – Governu liuhosi Sekreatária Estadu ba Igualidade (SEI), prioritiza ba programa empoderamentu ekonómika feto iha Timor-Leste.
“Ita nia objetivu atu hakbiit ekonómia feto sira liuliu feto iha área rurál liuhusi atividade negósiu hanesan loke kioske, haki’ak animál, ortikultura, imprestísimu no selu-seluk tan. Nune’e bele hamenus dependénsia ekonómia inan-feton sira ba sira-nia parseiru ka la’en hodi kontribui ba prevensaun violénsia doméstika no violénsia bazeia ba jéneru iha rai laran”, refere nota ne’ebé Agência TATOLI, asesu kinta ne’e.
Pontu fokál SEI husi munisípiu no postu sira estabelese asina akordu fundu rotativa tinan 2023 nian ho Asosiasaun Empoderamentu Ekonómia Feto Munisípiu no Grupu Benefisiáriu sira husi Munisípiu Aileu, Ainaro, Baucau, Covalima, Dili, Ermera, Manatuto, Lautem, Liquiça, no Viqueque. “Tanba fundu ne’e hanesan benefisíu ba futuru.
Fundu ne’ebé apoia ba grupu feto sira hosi Fundu Transferénsia Públiku (FTP) ne’ebé iha ninia implementasaun hahú husi tinan 2019-2023 ho nia mekanizmu rotativu ho montante rihun $2 ba kada grupu.
SEI estabelese asina akordu fundu transferénsia públiku, ne’ebé iha konteúdu akordu refere husu atu entrega fila fali osan inan ka rota fila fali tuir tempu ne’ebé determina ba iha Asosiasaun Empoderamentu Ekonómia Feto Munisípiu hodi entrega fali ba grupu seluk.
Molok hetan FTP ne’e, SEI tau ona kritéria balun ba Grupu Benefisiáriu Feto sira ne’ebé hakarak aplika liuhusi proposta ne’ebé sira hatama hanesan, ezisténsia grupu ne’ebé iha karta deklarasaun husi xefe suku, númeru membru grupu sira no atividade negósiu ne’ebé grupu sei halo.
“Ekipá tékniku SEI husi munisípiu no nasionál halo mós verifikasaun ba proposta no fatin grupu nian, nune’e mós realiza formasaun ba grupu foun kona-ba akuntabilidade hodi nune’e sira bele jere fundu refere ho di’ak bainhira hetan ona fundu ne’e,” tenik.
Membru grupu hosi kada munisípiu hamutuk 38, kompostu husi Munisípiu Ainaro grupu lima (5), Aileu grupu haat (4), Baucau grupu lima (5), Dili grupu lima (5), Ermera grupu tolu (3), Covalima grupu hitu (7), Liquiça grupu haat (4), Lautém grupu ida, Manufahi grupu rua (2), no Viqueque grupu rua (2).
Jornalista : Osória Marques
Editór : Florencio Miranda Ximenes
