DILI, 05 janeiru 2024 (TATOLI) – Ministru Interiór (MI), Francisco da Costa Guterres, hala’o enkontru ho Diretor Jerál, Nasionál no kargu diresaun no xefia sira ne’ebé tutela ba Ministériu Interiór, ho objetivu atu fó orientasaun polítika kona-ba planu ezekusaun orsamentu no programa 2024 nian.
“Horseik ita avalia ona progresu ezekusaun orsamentu tinan kotuk nian kabe mós ba Polísia Nasionál Timor-Leste (PNTL) no Sekretaria Estadu Protesaun Sivíl (SEPS) no ohin ne’e atu halo preparasaun ba planu ezekusaun orsamentu iha 2024, aleinde ne’e husu atu ita-bo’ot sıra prepara programa prioridade sira hotu, liuliu dezenvolvimentu ba atividade servisu no-mós dezafiu ne’ebé hasoru ba tinan oin, ita bele prepara di-ak liután planu ne’ebé halo ona tuir ita-nia programa”, Ministru Francisco dehan liuhosi komunikadu ne’ebé Agência TATOLI asesu hosi media MI, ohin.
Nia dehan, diresaun sivíl no PNTL presiza halo preparasaun ba ezekusaun programa no orsamentu maibé haree mós ba prosesu ezekusaun orsamentu trimestrál nian hodi tau atensaun ba prosesu tomak.
“Sirkulár ha’u hasai ona tanba ne’e kaer diretiva ne’ebé iha hodi halo tuir síkulu prosesu pagamentu. Husu para semana ida-nia laran ne’e prepara relatóriu hodi haruka mai gabinete hodi prodús relatóriu fulan ne’en nian hodi sai hanesan mata dalan, se la’e ita la hatene tuir osan ne’e uza ba saida. Segundu halo jestaun orsamentu hodi kontrola ida-idak nia osan iha kada primeiru trimestrál hodi hatene tuir ita bo’ot sira gasta ba saida”, nia salienta.
Governante ne’e esplika katak natureza finansa nian ne’e haree liu ba relatóriu servisu, nune’e nia sujere atu kada fulan presija halo atualizasaun atu wainhira tama iha finál tina foun fokus de’it ba orsamentu ikus hodi la prejudika funsionáriu sira halo servisu to’o kalan bo’ot.
“Ba rekursu umanu, presiza halo supervizaun hodi atualiza fali mapa pesoál ne’ebé iha tanba ha’u rona informasaun funsionáriu balun muda ona ba fatin seluk. Nune’e mós ba Gabinete Planeamentu Estratéjiku (GPE) imi bele prodús mak Key Performance Indicator ka ema bolu dehan Indikadór dezempeñu ba kada diresaun sira hodi haree se mak servisu la produtivu bele buka fali ema seluk. Kona-ba media nian sira agora muda fali ona ba Gabinete Asesoria Apoiu Jurídiku, maibé imi fó nafatin apoia ba sira”, nia friza.
Hafoin halo introdusaun badak, Ministru Francisco husu ba diresaun tutela atualiza mós dezenvolvimentu servisu ne’ebé maka halo ona, inklui dezafiu no planu prioridade ne’ebé maka define ona hodi halo iha tinan 2024 nia-laran tuir liña orientasaun ne’ebé sei delega.
Enkontru ne’e, hetan mós akompañamentu husi Diretór Jerál Administrasaun Finansa, Mariano de Araujo, Diretór Jerál Seguransa Prevensaun Konflitu, Gaspar de Sousa, Diretór Jerál Servisu Migrasaun, Inspetora Xefi Polísia, Adelaide da Rosa, Diretór Gabinete Planeamentu Estratejiku, Bendito Jose Casimiro, Inspetora Jerál Gabinete Inspesaun no Auditoria, Candida do Rosario B. Soares, Komandante Komandu Administrasaun PNTL, Superintendente Xefi polísia, Natercia Martins, asesór nasionais no-mós Xefi Gabinete sira.
Jornalista: Hortencio Sanchez
Editór : Zezito Silva
