DILI, 05 janeiru 2024 (TATOLI)—Sekretaria Estadu Formasaun Profisionál no Empregu (SEFOPE), sei despede tan traballadór timor-oan na’in-hitu atu bá serbisu iha Japaun, iha fulan ne’e nia laran.
Diretór Nasionál Empregu Estranjeiru, João Correia Pereira, hateten, traballadór ne’ebé atu arranka nu’udar kontinuasaun haruka traballadór bá serbisu iha Japaun ba etapa dahuluk, ne’ebé antes ne’e lansa ona iha tinan kotuk.
“Tinan kotuk ita halo ona lansamentu ba traballadór hamutuk na’in-14, ne’ebé na’in-hitu bá uluk ona, semana oin iha fulan ne’e haruka tan na’in-hitu seluk bá Japaun nu’udar traballadór estajiáriu,” João Correia Pereira, informa ba Agência Tatoli, via telefónika, sesta ne’e.
Notísia relevante : Antigu PM Taur husu traballadór timor-oan serbisu ho disiplina iha Japaun
Nia dehan, traballadór 14 ne’ebé daudaun hetan ona oportunidade bá Japaun, maski Governu Timor-Leste no Japaun seidauk iha akordu maibé Governu Japaun hahú koko fó oportunidade ba joven timor-oan sira.
“Ita hotu hatene Japaun ita seidauk iha MoU maibé traballadór hahú bá ona, ita espera tinan ne’e iha ona MoU nune’e iha sistema serbisu adekuadu hanesan Austrália no Koreia Súl ne’ebé ita halo, nune’e bele halo rekrutamentu traballadór sira seluk ne’ebé hein oportunidade bele bá serbisu iha Japaun. Tanba daudaun ne’e sira bá nu’udar traballadór estajiáriu,” nia akresenta.
Jornalista : Arminda Fonseca
Editora : Julia Chatarina
