DILI, 05 janeiru 2024 (TATOLI)—Prezidente Konsellu Kombatente Libertasaun Nasionál (CCLN-sigla Portugés), Vidal de Jesus “Riak Leman”, hateten veteranu rejistadu tinan 2009 nian ne’ebé verifikadu ona sei hetan pensaun iha 2025.
Tanba, nia hateten, iha tinan ida-ne’e Governu la prevee osan iha Orsamentu Jerál Estadu (OJE) 2024 hodi aloka ba pensaun veteranu sira-nian.
“Ita hakaas-aan agora maibé la prevee osan iha Orsamentu Jerál Estadu (OJE) 2024 nian. Tanba, ita seidauk hatene hira mak tama edital hodi hetan pensaun no hira mak la hetan pensaun. Ita seidauk tau osan tanba ita seidauk halo aprovasaun no tama iha edital,” Riak Leman hateten ba Agência Tatoli, via telefónika, ohin.
Reak Leman esplika, maske dadus veteranu rejistadu 2009 ne’e verifikadu ona maibé bainhira veteranu dadus veteranu rejistadu 2009 nian hetan ona aprovasaun mak hafoin tau osan maibé ida-ne’e tama ba Orsamentu Jerál Estadu 2025 nian.
“Ita-nia orsamentu 2024 nian liu tiha ona, ita labele tau orsamentu tanba ita seidauk hatane ema hira mak sei hetan pensaun no lae. Ita labele tau uluk osan enkuantu programa ida seidauk konklui no hetan aprovasaun. Dadus rejistadu veteranu 2009 nian ita verifika hotu ona maibé atu valida no taka sai ne’e hein ekipa verifikadór sei tun tan depois estrutura mak sei aprova,” nia esplika.
Verifikasaun dadus veteranu ne’e sei iha prosesu nia-laran tanba ne’e seidauk hatene hira mak falsifika, irregularidade no hira mak hetan no la hetan. Ida-ne’e sei hein no presiza tempu hafoin bele konklui.
Dadus veteranu rejistadu 2009 hamutuk 124.680. Liuhosi konteúdu ne’ebé mensiona iha Estatutu Kombatente Libertasaun Nasional, lei númeru 3/2006 no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekonesimentu Kombatente hanesan Libertasaun Nasionál ne ebé rejista ha tinan 2009.
Jornalista : Osória Marques
Editór : Cancio Ximenes
