Xefe Estadu ho IFC diskute hasa’e produsaun kafé iha Timor-Leste
DILI, 05 janeiru 2024 (TATOLI) – Prezidente Repúblika (PR), José Ramos Horta, hasoru malu ho Reprezentante International Finance Coperation (IFC), David Freedman, hodi ko’alia kona-ba produsaun kafé iha Timor-Leste.
“Enkontru ho Prezidente Repúblika ami diskute kona-ba dezenvolvimentu setór kafé, rona vizaun no ideia balun husi Xefe Estadu no mós diskute oinsá ita bele koopera hodi bele hasa’e liután produtu kafé iha Timor-Leste”, David dehan iha Palásiu Prezidensiál, ohin.
Nia hateten, iha enkontru ne’e, Xefe Estadu preokupa uitoan kona-ba produsaun no mós kona-ba padraun moris ba to’os na’in kafé ne’ebé ladun iha atensaun másima no asesu ba merkadu.
“Kompromisu hosi enkontru ohin ne’e mak ba oin IFC sei koopera ho entidade sira seluk atu dezenvolve konseitu no mós proposta ba inistiva sira oinsá ita bele hadia kafé iha futuru”, nia relata.
Aleinde ne’e, Xefe Estadu mós fó hanoin balun ba IFC relasiona ho ninia esperiénsia kona-ba dezenvolvimentu kafé iha pasadu no-mós vizaun ba futuru.
Nia haktuir, PR Horta mós temi kona-ba planu tinan ida-ne’e no mós planu tinan tuir mai ho vizaun ida klaru katak presiza servisu liuhosi parseiru entre setór públiku, setór privadu no mós parseiru dezenvolvimentu sira.
“IFC durante ne’e servisu parseria ho setór privadu sira iha Timor Leste. IFC nia natureza mak nia ajénsia internasionál ne’ebé foka ba dezenvolvimentu setór privadu ho objetivu atu kontribui ba dezenvolvimentu ekonómiku liuhosi dezenvolvimentu setór privadu”, salienta.
IFC servisu iha Timor Leste, halo ona kooperasaun ho ajénsia finanseiru sira, liuliu mikro finansa, Kaebauk no mós Moris Rasik, nune’e koopera ho Governu hodi hadia ambiente negósiu no-mós atu dezenvolve projetu BIP inkluidu Portu Tibar.
“Ami-nia parseiru Banku Mundiál sira fó sai kada fulan neen relatóriu kona-ba ekonómia iha Timor-Leste, husi IFC rasik ita haree katak maske ho esforsu tomak ita seidauk konsege dezenvolve setór produtiva to’o nivél ne’ebé ita hakarak, entaun ita tenta nafatin koopera ho entidade sira hotu ne’ebé relevante atu aselera prosesu dezenvolvimentu setór privadu no mós setór finanseiru”, konklui.
Jornalista: Hortencio Sanchez
Editór : Zezito Silva
