DILI, 06 janeiru 2024 (TATOLI)—Eskola Ensinu Báziku Sentrál (EBC, sigla portugés) terseiru síklu Fatumeta, entrega ona osan ho montante $5.962, ne’ebé antes ne’e rekolla hosi família estudante sira tanba la hetan autorizasaun hosi Ministériu Edukasaun Juventude no Desportu (MEJD).
“Ohin ami konvida autoridade sira mai iha ami-nia eskola ne’e inklui Diretór Edukasaun Munisípiu Dili, Parte Inspesaun Ministériu Eduakasaun hodi asiste simbólikamente serimónia entrega filafali osan ne’ebé ami rekolla ka kobra hosi prosesu matríkula ba alunu foun no tuan sira ba fali inan aman ka família alunu sira-nian,” Diretór Eskola EBC Fatumeta, Feliciano da Costa Gusmão, hateten iha Eskola Fatumeta, sábadu ne’e.
Osan ne’ebé konsege halibur kompostu hosi estudante sétimu anu kontribui $4.189 ba eskola no estudante oitavu ho nonu anu kontribui osan ho montante $1.773.
Maibé tanba Ministériu Edukasaun liuhosi Diresaun Nasionál Edukasaun Ensinu no Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál hasai sirkular rua hodi bandu eskoka públiku sira labele halo kobransa ba alunu sira, maka sira deside hodi devolve fali osan.
“Ita konsege rekolla de’it osan ba estudante 71 sétimu anu ho montante kada estudante $59 no ba estudante oitavu ho nonu anu hamutuk 197 pesoa ho montante osan $9 kada estudante tanba sirkulár hosi Ministériu Edukasaun nian tun ona ba eskola públika sira, entaun ita la kontinua halo tan kobrasa maibé prosesu matríkula kontinua la’o nafatin,” nia akresenta.
Notísia relevante : EBC Fatumeta simu estudante foun 400-resin
Tanba ne’e, liuhosi serimónia entrega osan matríkula, parte eskola fó de’it tempu ba inan aman sira ne’ebé antes ne’e selu ona osan ba eskola, maibé sira tenke lori ho resibu matríkula nian atu nune’e bele sai evidénsia ida atu eskola bele devolve filafali sira-nia osan.
Iha fatin hanesan, Diretór Edukasaun Munisípiu Dili, Carlito da Silva, konsidera dirijente sira iha Eskola EBC Fatumeta ne’e hatudu ona responsabilidade boot tanba sira halo ona asaun ne’ebé kontribui ba transparánsia hodi devolve fali osan, tanba sira rasik konsidera aktu sira ne’ebé eskola halo la kondís ho sirkulár ne’ebé maka ministériu fó sai.
”Ha’u apresiza tebes dirijente iha Eskola EBC Fatumeta sira. Karik iha eskola seluk maka konsege halo ona kobransa hanesan ne’e, di’ak liu tenke fó filafali ba inan aman sira tanba ita-nia ministériu la autoriza eskola públika atu halo kobransa,” nia hato’o.
Eskola públiku sira-nia responsabilidade maka atu loke nafatin espasu kada tinan ba estudante foun sira hodi mai halo matríkula foun, maibé laiha obrigasaun atu halo kobransa nein osan ida hosi família estudante sira.
Tanba kondisaun iha eskola públiku ne’e atu di’ak ka ladi’ak ne’e responsabilidade Diresaun Edukasaun nian inklui responsabilidade Ministériu Edukasaun nian, enkuantu parte eskola nian mak halo jestaun di’ak atu alunu sira bele hetan prosesu aprendizajen di’ak no seguru hodi garante estudu iha futuru.
Pedro dos Santos, reprezenta inan aman alunu sira hotu, hato’o ninia agradesimentu ba Ministériu Edukasaun tanba bele halo ona kontrolu másimu ba eskola públika sira iha tinan ida-ne’e liuhosi sirkulár ne’ebé fó sai hodi bandu labele halo kobransa.
Durate ne’e kuaze eskola públiku sira hasai regra ida-idak nian sein halo konsultasaun ho inan aman sira no la husu autorizasaun hosi Governu. Dala barak halo inan aman sira hasoru problema boot tanba laiha osan atu halo matríkula foun.
Maibé ba tinan ida-ne’e bele ona fó espasu ba inan aman sira atubele dada iis tanba la sente todan ida atu lori oan sira tama iha eskola públika tanba laiha ona kobransa hanesan tinan-tinan.
Maski nune’e, Pedro dos Santos husu ba ministériu atu kontinua tau nafatin atensaun ba uniforme alunu sira.
“Sera que laiha ona kobransa iha eskola públiku ne’e oinsá labarik sira atu uza farda. Karik kontinua uza ida-idak ninia farda hosi kada eskola ka oinsá?,” nia kestiona.
Hatan ba asuntu uniforme ne’e, Diretór Carlito, dehan, asuntu ne’e kompeténsia Ministériu Edukasaun nian. Eskola ho inan aman sira lalika foti ida-ne’e hanesan problema boot ida.
“Fiar katak bainhira Ministériu Edukasaun bandu ona laiha kobransa ba eskola públika sira, signifika sira iha ona planu atu prepara farda ba eskola públika sira, maibé bainhira maka atu mai, ida-ne’e maka seidauk hatene,” nia tenik.
Jornalista : Tomé Amado
Editora : Julia Chatarina
