DILI, 07 janeiru 2024 (TATOLI)- Joven sira hosi Suku Fatuhada, realiza Natál hamutuk ho tema hametin pás no estabilidade iha idak-idak nia hela-fatin.
Xefe Suku Fatuhada, Marcelino Soares, hateten, dalabarak Fatuhada iha área BTM no área sira seluk iha suku Fatuhada nian sempre mosu problema entre joven ho joven, tanba kauza hosi provoka malu, nune’e halo autoridade lokál, autoridade polísia inklui inan aman sira preukupa ho situasaun ne’e.
Iha tinan foun 2024 husu ba joven Fatuhada tomak atu halo reflesaun hodi hateke ba oin atu no hakribi violénsia hodi kontribui ba pás no estabilidade.
“Ohin ita hamutuk iha fatin ida-ne’e atu hodi festeza Natál no tinan foun hamutuk no inisiativa ne’e mai hosi ita-boot sira (joven) Fatuhada BTM ne’ebé ho tema ‘Hametin Nafatin Pás no Estabilidade iha Bairru BTM’. Ida-ne’e inisiativa di’ak no ha’u husu ba imi hotu tenke halo tuir nafatin tema ne’ebé mak imi tau ne’e, ida ne’e importante hosi ita-nia hamutuk iha kalan ida-ne’e,” Marçelino Soares hateten iha Fatuhada BTM, sábadu ne’e.
“Oportunidade ida-ne’e husu ba joven sira katak ita-nia hamutuk ida-ne’e la’ós hanesan serimónia ba ita atu festeza de’it, maibé hanesan momentu reflesaun ida ba imi (joven sira) oinsá atu refleta saida mak imi halo ona 2023 no saida mak imi atu halo iha tinan foun ida-ne’e (2024), hahú hosi oin no ba oin hodi kontribui ba pás no estabilidade,” nia fó hanoin.
Marçelino Soares husu ba joven Fatuhada atu aproveita tempu hodi estuda hodi duni mehi ba futuru, duké halibur malu iha tempu kalan hodi toka, hemu tua, nune’e hakilar hodi perturba em seluk nia deskansa kalan.
Tanba, dala barak asaun joven sira nian hanesan ne’e mak kontribui hodi hamosu instabilidade iha bairru no halo inan aman sira ulun moras.
“Ha’u husu ba joven sira halo atividade ne’ebé pozitivu hodi kontribu ba pás no estabilidade,” nia afirma.
Nia husu mós ba inan aman sira atu kontrola oan sira-nia movimentu iha tempu kalan, kuandu tuku 20:00 kalan, oan sira tenke iha hotu ona uma, kuandu sira la tama uma tenke buka tuir.
Xefe Departamentu Administrasaun Komandu PNTL Munisípiu Dili, Inspetór Xefe Polísia Lino Matos, apresia ho inisiativa joven fatuhada ne’ebé realiza festa Natál no tinan foun hamutuk hodi hametin relasaun entre joven sira iha suku Fatuhada.
“Ha’u apresia ho imi-nia hamutuk ne’e. Ho serimónia haan hamutuk bele hametin imi joven sira-nia relasaun iha suku Fatuhada atu nune’e hotu-hotu bele kontribui ba pás no estabilide iha ita-nia rai,” nia dehan.
Reprezentante Juventude Fatuhada BTM, Zeferino Ximenes, hateten, serimónia haan hamutuk Natál no tinan foun ne’e mai hosi inisiativa joven sira hosi Fatuhada BTM nian.
Nia dehan, serimónia ne’e sempre halo iha kada tinan bainhira tama ba Natál no tinan foun ho objetivu atu fortelese relasaun amizade entre joven sira iha suku Fatuada tomak.
“Serimónia ida-ne’e la’ós foin mak ami realiza maibé dezde maihosi ami-nia maun sira dezde 2008 no ohin ami sei kontinua atu hametin relasaun amizade fraternidade entre ami joven sira iha Suku Fatuhada,” nia katak.
Nia husu ba joven Fatuhada hosi aldeia lima fó liman ba malu hodi kontribui pás no estabilidade iha idak-idak nia hela fatin.
“Hanesan joven no hanesan jerasaun foun ita hotu iha devér no obrigasaun atu kria pás no estabilidade iha ita-nia hela fatin, seguransa la’ós iha polísia no forsa, maibé mós mai hosi ita idak-idak,” nia afirma.
Nia agradese ba apoiu tomak hosi autoridade Suku Fatuhada, inan aman, joven sira Fatuhada inklui joven Fatuhada BTM ne’ebé hela iha diáspora.
“Lahaluhan agradese ba imi nia apoiu tomak nia apoiu tomak ne’ebé ohin ita bele realiza konvivu ida-ne’e ka haan hamutuk Natál no tinan foun ida-ne’e,” nia kongratula.
Jornalista: Natalino Costa
Editór: Evaristo Soares Martins
