DILI, 07 janeiru 2024 (TATOLI)- Líder Nasionál no eis Prezidente Repúblika, Taur Matan Ruak, apela iha tinan foun ne’e, ba timoroan hotu atu kontinua mantein pás no estabilidade hodi lori Timor ba oin.
“Ha’u nia mensajen primeiru atu kontinua tau esperansa ba Futuru Timor Nian. Futuru Timor la depende ba ha’u, la depende ba sira ne’ebé uluk halo funu ou sira ne’ebé la halo funu, futuru Timor nian depende ba jerasaun ba jerasaun. Ne’e hanesan ita halo toos, tinan ida udan la mai batar mate, ne’e la siknifika tinan oin la halo ona, ita la halo ne’e oinsá, entaun ita-nia nasaun mós hanesan, iha tempu di’ak iha tempu aat, mas ita tenke fi’ar nafatin para fó kontribuisaun para bele dezenvolve ita-nia Nasaun, i liu-liu hametin Pás. Para Pás iha ne’e hahú hosi ita-nia fuan”, apela Eis Xefe Estadu ne’e hafoin Natál hamutuk ho labarik orfanatu sira iha Dili.
Tanba ne’e, Líder nasionál ne’e apela “ba ha’u nia oan Joven sira apela ba Komunidade sira tomak, ha’u hatene sira barak deskontentu mas sira hatene katak Governu ida ba Governu ida semak hili ne’e Povu mak hili, labele hili tia depois imi kuandu la kontente dehan sobu tia, ne’e labele iha, iha Timor labele iha, ha’u hakarak aviza ida ne’e,” katak Taur.
Eis PR ne’e hatutan: “Ita-nian deskontentamentu ne’e hanesan mós dalaruma ita ba tebe bola lakon mas ne’e la siknifika katak ita lakon jogu, ita lakon iha jogu ida mas ita la lakon iha desportu, ita kontinua nafatin ita-nia desportu, ne’ebé ha’u apela para ké hotu-hotu fó konfiansa, tau matan ba ita-nia rai, tau matan ba pás no estabilidade para dezenvolve ita-nia Nasaun ba oin”, sujere Eis Prezidente Repúblika ne’e.
Jornalista : Jesuína Xavier
Editór : Florencio Miranda Ximenes
