iklan

NASIONÁL, INTERNASIONÁL, HEADLINE

Don Virgílio Kardeál hato’o sentidu lutu ba falesimentu Bispu Mgr Antonius Pain Ratu, SVD

Don Virgílio Kardeál hato’o sentidu lutu ba falesimentu Bispu Mgr Antonius Pain Ratu, SVD

Bispu Eméritu Dioseze Atambua, Mgr Antonius Pain Ratu, SVD.Imajen/espesiál

DILI, 08 janeiru 2024 (TATOLI)– Arbispu Arkidioseze Metropolitana Dili, Don Virgílio Karedeál do Carmo da Silva, hato’o sentidu lutu profunda ba sarani katólika iha provínsia Nusa Tenggara Timur (NTT)- Indonézia, ba falesimentu Bispu Eméritu Dioseze Atambua, Mgr Antonius Pain Ratu, SVD, ne’ebé husik iis ho idade 95, iha loron sábadu 6 janeiru 2024.

Sua Eminénsia Don Virgílio Kardeál do Carmo da Silva, SDB. Imajen /Tatoli

“Lori Igreja Timor-Leste nia naran dezde ha’u rona notísia tristeza kona-bá Bispu  Mgr Antonius Pain Ratu, SDV, nia mate, ha’u telefone kedas hodi ko’alia diretamente ba bispu Atambua Dominik, ami na’in-rua ko’alia, no hato’o ita nia sentidu kondolénsia ba sarani katólika sira iha Atambua tanba nia bibi atan domin na’in ida husik ona sira,” Don Virgílio Kardeál hateten ba Agência TATOLI, iha sede Episkopál Lecidere-Dili.

Don Virgílio Kardeál mós agardese ba Bispu Mgr Antonius Pain Ratu, nia kontribuisaun ba apoia igreja Timor-Leste liuhosi formasaun ba Amu-lulik timoroan sira iha Atambua-Kupang.

“Uluk ita nia seminarista barak hetan apoiu formasaun iha semináriu Kupang ninian. Ita nia padre timoroan barak mak hateten sira eskola iha ne’ebá, Bispu matebian mós sai sira nia formador no sira nia  dosente. Desde uluk ita iha kooperasaun di’ak ho Igreja Atambua. Igreja Bin alin sempre fó apoiu ba malu”, Bispu ne’e agardese.

Daudaun ne’e, Don Virgílio Kardeál afirma igreja katólika Timor-Leste ho Kupang kontinua iha kooperasaun di’ak hanesan iha selebrasaun ordenasaun no kondeferasaun Bispu timorense, NUNE’E Bispu  no padre sira sempre mai fó sira nia apoia.

Tuir ajenda, Don Virgílio Kardeál no Bispu Don Noberto do Amaral sei partisipa iha serimonia funebre Bispu Mgr, Antonius Pain Ratu, SDV iha Kupang-Atambua.

“Tanba ita nuúdar igreja viziñu no hatudu jestu solidariedade. Mak nia  seremónia funebre iha loron aban (09/01), ha’u rasik hamutuk ho Bispu Don Noberto do Amaral, ba partisipa iha Atambua. Iha mós Amu-luluik balun ne’ebé MAK akompaña ami”, nia hateten.

Bispu Eméritu Mgr, Don Antonius Pain Ratu, SDV, moris iha loron 02 janeiru 1929 no hakotu iis iha loron 06 janeiru 2024 iha ospitál Atambua-Kupang-Indonézia.

Jornalista   : Jesuína Xavier

Editór          : Florencio Miranda Ximenes

iklan
iklan

Leave a Reply

iklan
error: Content is protected !!