Governu sei selebra loron nasionál Ai-kameli tinan ne’e iha Manatuto
DILI, 08 janeiru 2024 (TATOLI)—Governu liuhosi Ministériu Agrikultura Pekuária Peska no Floresta (MAPPF) tinan ne’e sei selebra loron nasionál ai-kameli no floresta ba dala-hitu iha Munisípiu Manatuto ho tema ‘kuda ai ba moris di’ak iha futuru’.
Diretór Nasionál Jestaun Floresta Basías Indrográfuka no Área Mangais, Adalfredo do Rosário Ferreira, hateten, selebrasaun tinan ne’e diferensa oituan ho anteriór tanba sei konvida parseiru kooperasaun hanesan Asian Forest Cooperation Organization (AFoCO), Sekretáriu Estadu Floresta hosi Koreia Súl inklui membru Governu sira.
Notísia relevante : MAPPF halo produsaun viveiru ai-kameli hamutuk 600.000 iha tinan 2023
“Atividade ne’ebé ita sei hala’o iha loron nasionál ai-kameli no floresta iha loron 13 janeiru agora, maka ita sei kuda ai-kameli hamutuk 200 to’o 500 iha fatin Balak suku Aiteas, postu administrativu Manatuto Vila,” Diretór informa ba Agência Tatoli, iha ninia knaar fatin Caicoli, segunda ne’e.
Sekretária Estadu Floresta mós loke mini espozisaun iha Balak hodi aprezenta produtu ai-oan sira hanesan ai-kameli, hudi, kulu kaka, ai-ata, rambutan, kakau, baunilla, ai-mahonik, saria, samtuku ai-hali, ai-kakeu, ai-kase, ai-teka no aprezenta mós imajen balun hosi servisu floresta nian.
Atividade sira ne’e la’o tanba hetan fundu hosi Governu liuhosi Sekretaria Estadu Floresta (SEF) no AfoCO ho valór $12.000.
Jornalista : Arminda Fonseca
Editora : Julia Chatarina
