DILI, 08 janeiru 2024 (TATOLI)—Membru Parlamentu Nasionál (PN), liuhusi Deputada bankada KHUNTO, Olinda Guterres, louva serbisu Polísia Nasionál Timor-Leste (PNTL) ho FALINTIL Forsa Defeza Timor-Leste (F-FDTL) hodi asegura seguransa la’o ho hakmatek iha territóriu durante loron boot natál no tinan foun 2024.
“Ha’u fó parabéns ba Polísia Nasionál Timor-Leste no F-FDTL, tanba ita hotu-hotu natál no ano novo, ita pasa ferias ho ita-nia família tomak ne’ebé mak iha munisípiu no Dili, maibé ha’u haree polísia no F-FDTL sira nunka pasa ferias ho ninia família. Tanba de’it sira-nia kna’ar ne’ebé hala’o sira labele husik hela no ita hotu hatene Dili laran ne’e hakmatek, no hakmatek ne’e hosi polísia sira haree estabilidade la’o kapaas tebes,” Deputada Olinda Guterres hato’o liuhosi intervensaun iha reuniaun plenária PN, segunda ne’e.
Nune’e, hanesan reprezentante povu hakarak louva tebes serbisu di’ak hosi PNTL ho F-FDTL la haree ba kór hodi garante pás no estabilidade iha Timor-Leste.
Deputadu CNRT, Gabriel Soares, hakarak sekunda mós hodi apresia serbisu PNTL-F-FDTL fó nia kontribuisaun asegura loron boot iha territóriu la’o hakmtek.
Deputada PD Rozenha Martins, fó apresiasaun ba PNTL ne’ebé fó seguransa di’ak durante loron natál no tinan foun, tanba situasaun la’o hakmatek tebes iha territóriu laran tomak.
Jornalista : Nelson de Sousa
Editór : Cancio Ximenes
