DILI, 08 janeiru 2024 (TATOLI) – Diretór Jerál Servisu Koorporativu iha Ministériu Saúde, Marcelo Amaral, hateten Ministériu Saúde (MS), iha 2024, sei harii fasilidade saúde hamutuk 15 iha munisípiu ualu hanesan Manatuto, Dili, Aileu, Lautem, Ainaro, Liquica, Baucau no Manufahi.
“Iha tinan ida-ne’e ita sei harii fasilidade saúde hamutuk 15 iha munisípiu ualu ho orsamentu hamutuk millaun $5.3, entaun ita propoin ba fundu infraestrutura kona-ba proposta ida-ne’e tanba desizaun ne’e ita hola iha Komisaun Revizaun Oramentu”, Marcelo Amaral relata iha nia kna’ar fatin Caicoli, ohin.
Nia esplika, MS, iha tinan ida-ne’e, sei konstrui postu saúde iha Manatutu, renovasaun ospitál Dr Antonio Carvalho Lahane, konstrusaun sentru saúde Laulara Munisípiu Aileu, konstrusaun sentru saúde Lore II, Munisípiu Lautem.
Konstrusaun Moralha iha sentru saúde internamentu Ainaro, konstrusaun moralha terenu futuru ospitál Ainaro, konstrusaun sentru saúde Maubessi Ainaro, konstrusaun postu saúde no rezidénsia médiku iha Suku Dato Munisípiu Liquiça, konstrusaun postu saúde no rezidénsia médiku Wakala Munisípiu Buacau.
Konstrusaun postu saúde no rezidénsia médiku Suku Ariana Baucau, konstrusaun postu saúde no rezidénsia médiku iha Suku Ossogori Baucau, konstrusaun postu saúde no rezidénsia médiku iha Suku Maina I Lospalos, konstrusaun postu saúde no rezidénsia médiku iha Lakawa Luro Lautem, konstrusaun postu saúde no rezidénsia médiku iha Suku Parlamentu Lautem no kontrusaun postu saúde no rezidénsia médiku iha Suku fahi-nehan Turiskai Munisípiu Manufahi.
MS estabelese ona, durante ne’e, postu saúde iha territóriu nasionál hamutuk 345, ba oin sei kontinua aumenta atu bele fó atendimetu dignu ba pasiente sira iha Timor-Leste.
Jornalista : Felicidade Ximenes
Editór : Zezito Silva