Top

Opozisaun husu Governu solusiona lalais problema aimoruk “stock out”

Ai-moruk sira iha armazen Servisu Autonomu Medikamentu no Ekipamentu Saúde (SAMES) iha Kampu Alor Dili. Imajen Tatoli/Francisco Sony

DILI, 08 janeiru 2024 (TATOLI)—Deputada opozisaun hosi bankada FRETILIN, Helena Martins Belo, preokupa problema aimoruk ‘stock out’ iha fasilidade saúde sira iha territóriu, nune’e ezije nafatin ba Governu liuhosi Ministériu Saúde atu solusiona lalais.

‘’Situasaun ne’ebé agora akontese iha tinan 2023 ita liu hotu ona no tinan foun ne’ebé agora daudaun sente hela katak, situasaun iha Timor laran ne’e kuaze grave. Primeiru mak iha saúde, stock aimoruk ne’ebé mínimu tebes loos ona, osan mak laiha ka nusa. Orsamentu retifikavu no kompromisu loron 120 ne’e komprometidu ba povu ne’e, ita haluha tiha ona. Tanba ne’e, laiha razaun atu hateten Governu tenke hola pozisaun ida atu atende duni ba nesesidade povu ho urjente no imediatu, tanba osan ne’e iha hela,” nia levanta liuhosi reuniaun plenária PN, segunda ne’e.

Tuir nia, iha aimoruk ne’ebé tuir loloos item 454 kuaze laiha, mínimu tebes ona tanba ne’e mak presiza duni tau atensaun ba asuntu ida-ne’e.

“Tanba loro-loron mak ita-nia povu simu fali reseita hosi doutor sira, mai fali sosa iha klínka privadu sira-ne’e oinsá. Kuantu mais, ita-nia Primeiru-Ministru dehan sei la fó autorizasaun atu simu reseita hosi doutor atu ba fali klínika ne’e, horibainhira PM atuál rasik fó hatene iha públiku,” nia dehan.

Tanba ne’e, parte opozisaun reforsa tan katak labele akontese beibeik problema ida-ne’e, tanba barak liu haruka ami iha klínika privadu hanesan DMC ho folin $40 no $50, ida-ne’e povu sira ba foti osan ne’ebé no sira bele mai asesu iha laboratóriu ne’ebé bainhira fó reseita ba sira.

Nia mós lamenta ho situasaun, haree ba Governu hapara ona pesoál saúde kontratadu sira-nia kontratu, entaun ida-ne’e difikulta mós atendimentu públiku kuaze iha territóriu laran tomak, tantuiha postu no sentru saúde sira iha territóriu nasionál.

Aliénde ne’e, motorista kontratadu sira-ne’ebé lori kareta ambulánsia balun nia kontratu hapara ona, tanba ne’e liuliu akontese iha postu administrasaun Vemasse hapara duni ona, agora krareta para hela maibé laiha motorista atu lori ambulánsia.

Tanba ne’e, opozisaun FRETILIN lamenta tebes no konsidera situasaun grave iha parte saúde nian no Governu tenke hola pozisaun atende povu imediatu ho urjente.

Deputadu FRETILIN, Antonio Calau, sekunda ho problema aimoruk laiha nune’e nafatin fó hanoin ba Governu, hanesan iha Orsamentu Jerál Estadu (OJE) 2024, ita kestiona Ministra Saúde no responde katak aimoruk tama ona ita sei normaliza aimoruk iha semana ida-nia laran, maibé to’o ohin loron ita sei kontinua hasoru problema boot ba aimoruk, nune’e husu tau atensaun.

Vise Ministru ba asuntu Parlamentár, Adérito Hugo da Costa, dehan dezde IX Governu toma pose iha inísiu jullu no to’o setemtru deteta rezerva iha armazen aimoruk ninia menus tama ona iha nível menus hosi 50%, nune’e liuhosi Konsellu Ministru ho aprezentasaun saúde pontu situasaun ba armazen aimoruk ninian deside deliberasaun autoriza Ministériu Saúde halo akizasaun ho karáter urjente no mezmu urjente maibé nafatin liuhosi regra aprovizionamentu no prosesu ne’e lao.

Aimoruk tama daudaun ona maibé aimoruk ne’ebé tama nia stock ne’e la konsege prienxe sentru no klínika saúde sira hotu iha nasionál to’o baze ba aimoruk ne’ebé urjente tebes, tama duni maibé ho fazeada hosi kompaña no ita espera labele demora liu tan kompañia ne’ebé fornese lala’is hodi prienxe nesesidade aimoruk.

Jornalista : Nelson de Sousa

Editór        : Cancio Ximenes  

Publisidade

Leave a Reply

Latest Post

error: Content is protected !!