iklan

HEADLINE, MUNISÍPIU, OÉ-CUSSE (RAEOA), SEGURANSA

PNTL Oé-Cusse prosesa sidadaun 20 ba Ministériu Públiku

PNTL Oé-Cusse prosesa sidadaun 20 ba Ministériu Públiku

Komandante PNTL Oe-Cusse, Superintendente Polísia, Nicolau Francelino da Costa. Imajen Tataoli/Abílio Elo Nini.

OÉ-CUSSE, 08 janeiru 2024 (TATOLI) –  Komandu Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), prosesa sidadaun na’in-20 ba Ministériu Públiku (MP) tanba prátika sunu fogete.

Komandante PNTL Oé-Cusse, Superintendente Nicolau Francelino da Costa, informa, hosi parte seguransa nian kontroladu tanba hafoin konferénsia imprensa iha nasionál hosi komandu konjunta PNTL ho F-FDTL, fó sai katak, depois natál akontesimentu barak, sunu fogete iha fatin-fatin.

Tan ne’e hosi komandu Rejionál Oé-Cusse, orienta ekipa patrullamentu tama sai bairru, no konsege rekolla evidénsia balu, no daudaun ne’e iha hela komandu hodi submete ba prosesu invetigasaun.

“Kazu ne’e liga ho ema sunu fogete, kuaze ema na’in-20 mak komandu rejista iha períodu natál no tinan foun, maibé kazu sira-ne’e normál,  ita sei enkamiña ba investigasaun kriminál ba prosesu normál iha Ministériu Públiku,” Nicolau Francelino da Costa, ko’alia iha Oé-Cusse, segunda ne’e.

Tuir nia, rezultadu investigasaun mak sei hatene, tanba sidadaun maka importa fogete hosi fronteira  no balu uza tradisionál, no balu hola iha loza sira iha Oé-Cusse.

“Ida-ne’e mak ita sei hetan iha prosesu investigasaun, tanba antes ne’e ita fó-sai aviza ba loza no kioske sira iha Oé-Cusse atu labele fa’an fugete,” nia afirma.

Dirijente PNTL Oé-Cusse ne’e, informa, antes ne’e, atu tama natál no tinan foun situasaun ein-jeralmente iha Oé-Cusse la’o hakmatek di’ak tebes tanba laiha kazu, maibé akontese de’it kazu liga ho servisu tránzitu ninian.

“Dezde inisíu kedas ami apela ba ita-nia komunidade, katak natál ho tinan foun ne’e, ita hotu fó kontribuisaun atu hametin pás no estabilidade, nune’e sarani sira bele festeza hamutuk ho família ho ambíente seguru,” nia katak.

Jornalista: Abílio Elo Nini

Editor: Evaristo Soares Martins     

iklan
iklan

Leave a Reply

iklan
error: Content is protected !!