DILI, 08 dezembru (TATOLI) – Diretór Ezekutivu Forum Organizasaun Naun Governamentál Timor-Leste (FONGTL), Valentim da Costa Pinto, lamenta tebes polítika Ministériu Saúde ne’ebé hapara ona kontratu ba profisionál saúde sira iha área rurál tanba laiha ona pesoál saúde atu fó atendimentu ba populasaun ne’ebé hetan moras.
“Ami lamenta tebes no preokupa ba profisionál saúde sira ne’ebé termina sira nia kontratu servisu iha ospitál, sentru saúde no postu saúde sira hodi difikulta ba atendimentu komunidade sira ne’ebé moras no hakarak asesu ba saúde,” Diretór Ezekutivu ne’e hatete ba Agência TATOLI iha kna’ar fatin-Caicoli-Dili.
Nia rekomenda ba MS atu halo avaliasaun ruma tanba pesoál saúde sira iha territóriu nasionál la to’o, tanba ne’e di’ak liu aumenta tan pesoál saúde sira.
“Postu saúde sira iha Timor laran tomak ne’e balun abandonadu, maske ita iha uma, maibé pesoal saúde laiha atu fó atendimentu. Ha’u fó ezemplu iha sentru saúde iha suku Turiskai nian ne’e laiha pesoál saúde”, katak nian.
Diretór ne’e afirma Ministériu Saúde hakarak halo termina kontratu profisionál saúde tenke haree didi’ak nia konsekuénsia sira.
“Ministra Saúde tenke haree didi’ak nia desizaun ne’ebé afeta ba ema, tanba setor saúde ne’e jere ema nia vida. Ha’u haree rekrutamente foun ba pesoál saúde sira la garante servisu di’ak, tanba servisu saúde ne’e tékniku loos, komplexa no sensitivu.
Tuir dadus hosi Ministériu Saúde (MS) katak profisionál saúde sira ne’ebé kontratu konklui iha 31 dezembru hamutuk 2.256. MS foin rekruta no sei simu uluk profisionál saúde ho totál 229, mak sei fó atendimentu uluk ba pasiente sira iha Hospital Nasionál Guidu Valadares.
Profisionál saúde sira-ne’e Ministériu Saúde kontratu ho orsamentu Covid-19 nian, entaun mai 2023 orsamentu hotu ona signifka katak kontratu remata no la kontinua utiliza iha 2024. Ho ida-ne’e afeta ba atendimentu sira, maibé ministériu hahú loke ona rekrutamentu.
bainhira instituisaun sira presiza fali profisionál saúde, tenke liuhosi rekrutamentu atu bele hala’o fila fali servisu.
Tuir dadus husi Ministériu Saúde katak totál profisionál saúde ne’ebé permanente hamutuk 3.559, husi ne’e rejime espesiál hamutuk 3.174 no rejime jerál hamutuk 385.
Daudaun ne’e, Komisaun Permanente Rekrutamentu ba kontratadu sira iha Ministériu Saúde forma ona ekipa painel juri atu halo ona esforsu molok tama hodi avalia aplikante 1.102, nune’e fevereiru bele selebra ona kontratu ho profisionál saúde sira hodi halo atendimentu populasaun sira.
MS loke vaga ne’e iha 5 dezembru to’o 18 dezembru, aplikante hamutuk besik rihun neen mak konkorre. Iha 30 dezembru, hahú halo selesaun dokumentu ba aplikante hamutuk 1.102 mak pasa nune’e sei tama ba selesaun entervista iha loron 6 to’o 14 janeiru no sei pasa hamutuk 229 mak sei hala’o uluk servisu atendimentu iha Hospitál Nasionál Guido Valadares (HNGV).
Jornalista: Jesuína Xavier
Editór : Florencio Miranda Ximenes
