DILI, 09 janeiru 2024 (TATOLI)—Jestór Loja Hakbi’it Agrikultura iha Meimart Fatuhada, Teobaldo da Costa Soares, hamutuk ho ninia ekipa tenta hela rezolve internál problema selu arrendamentu fatin tanba daudaun ne’e loja ameasadu atu taka.
“Ha’u buka hela mekanizmu no aprosima ho maluk sira ne’ebé bele apoiu ha’u atubele ultrapasa situasaun ne’e, karik ami labele rezolve internál mak ami taka, tanba osan ida ne’e mak fó garantia atu ami bele ultrapasa maibé seidauk iha rezultadu, Plaza Meimart nia na’in fó ona deadline atu selu entre loron 15 – 20 janeiru 2024, se la selu iha tempu ne’ebé determinadu ona maka Plaza na’in obriga ami tenke hamamuk ona fatin,” Teobaldo da Costa Soares, informa ba Agência Tatoli, via telefónika tersa ne’e.
Tanba ne’e, jestór loja husu kolaborasaun hosi parte Governu hodi bele liu situasaun ne’e.
“Ha’u seidauk dehan taka maibé iha ona sinál ka amesadu nia-laran atu taka, se karik Governu la selu osan $51.760 ne’ebé alokadu ona iha tinan 2023 hodi selu produtu sira ne’ebé Loja Agrikultór fornese ba família afetadu inundasaun iha 04 abril 2021,” nia akresenta.
Jestór loja dehan, Governu antes ne’e aprova ona osan $51.760 iha tinan 2023 atu selu produtu ne’ebé fornese hosi Loja Hakbiit, nune’e parte loja bele utiliza selu arrendamentu, embalajen no pulsa eletrisidade to’o rekupera hikas loja nia fundu, maibé to’o agora parte Governu seidauk iha resposta.
Daudaun ne’e, parte administrasaun loja tenta konfirma Ministériu Agrukultura Pekuária Peska no Floresta (MAPPF), maibé Diretór responsável laiha fatin.
“Ohin ha’u ba konfirma ona iha ministériu atu prosesa lalais hodi bele fó apoiu ami bele hala’o operasionál loja nian, maibé Diretór ne’ebé toma konta ne’e moras hela, ida-ne’e halo ami laran susar maibé ami sei tenta buka dalan atubele rezolve, tanba bainhira loja taka mak sei fó impaktu ba agrikutór sira ne’ebé distribui produtu mai loja. Ha’u bele dehan, iha to’os-na’in 600 resin mak durante ne’e formese produtu mai loja, nune’e bainhira taka duni, bele implika ba sira, liu-liu kona-ba merkadu ne’ebé bele hatutan sira-nia liman ain,” nia hato’o.
Notisía relevante : Loja Hakbi’it Agrikultura rekolla millaun $2,3 durante tinan-haat
Iha sorin seluk, Diretór Nasionál Agro-Komérsiu sesante, Fernando Egídio Amaral, liuhosi nia konta iha rede sosiál informa katak, to’os-na’in sira sei mai reklama sira-nia direitu.
“Agrikultór no empreendedór sira ne’ebé na’in ba produtu ho valór maizumenus $250.000 sei tun hotu mai iha Dili hodi husu responsabilidade Governu ne’ebé derepente hakotu subsídiu sein analiza didi’ak ba risku ne’ebé bele mosu,” nia dehan.
Nia nota, Jestór Loja Hakbi’it Agrikultura laiha kbiit komunika ba agrikultór no empreendedór sira kona-ba amesadu atu taka ne’e tanba MAPPF foin halo desizaun formál la subsidia ona loja iha loron 28 dezembru 2023.
Loja Hakbi’it Agrikultura iha Meimart Fatuhada inaugura hosi Ministru Agrikultura no Peska iha tinan 2019 no liuhosi Diresaun Nasionál Agro-Komérsiu planeia atu gradualmente hamenus subsídiu hosi 100% ba 60% no 30%. Ikus liu Governu kontinua fó apoiu 15% tanba razaun loja ne’e sai mós fatin ba promosaun produtu agrikultura lokál.
Jornalista : Arminda Fonseca
Editora : Julia Chatarina
