DILI, 09 janeiru 2024 (TATOLI) – Governu Austrália apoiu vasina raiva hamutuk doze 200.000 ba Minsitériu Agrikultura Pekuaria Peskas no Floresta (MAPPF) hodi responde ba moras raiva iha Timor Leste.
“Ohin ofisialmente entrega vasina raiva animál nian hamutuk doze 200.000 husi Governu Austrália ba Governu Timor-Leste atu apoia esforsu sira hodi prevene raiva ne’ebé da‘et mai Timor-Leste”, Embaixadora Austrália iha Timor-Leste, Caitlin Wilson, dehan iha serimónia entrega vasina raiva iha Uma Adat MAPPF Comoro, horseik.
Nia hateten, Austrália no Timor-Leste iha istória naruk hodi servisu hamutuk kona-ba kestaun agrikultura no bioseguransa. Tanba ne’e mantein ho relasaun ne’ebé forte entre nasaun rua ne’e.
Governu Austrália fó ona apoiu ba MAPPF no Ministériu Saúde hodi hasa‘e konsiénsia públiku kona-ba moras raiva ne‘e”, nia afirma.
Nia haktuir, Governu Austrália mós fó apoiu hodi atualiza prosedimentu operasionál padraun kona-ba jestaun prátika di’ak liubá suspeitu kazu raiva iha asu, formasaun kona-ba tratamentu asu, kapasidade teste no avaliasaun ba populasaun ba asu sira ne‘ebé sei hahú iha inísiu tinan 2024.
“Liuhosi relasaun ne’ebé estabelese ona ho Timor-Leste, Austrália fó apoiu ba Ministériu Saúde no INSP-TL hadi dezenvolve matadalan lokál ne‘ebé apropriadu, jestaun ba asu tata no treinu pesoál klínika xave sira iha munusípiu, fronteira no Dili”, nia relata.
Vasina sira ne’ebé Governu Austrália fó, komplementa ninia apoiu ba moras raiva iha rejiaun ne’e no ninia kompromisu globál hodi halakon moras ne’e iha tinan 2030.
Iha fatin hanesan, Minsitru Agrikultura Pekuaria Peskas no Florestas (MAPPF), Marcos da Cruz, informa ministériu simu vasina hamutuk 200.000 husi Governu Austrália atu halo vasinasaun raiva ba asu iha Timor-Leste.
“Iha tinan kotuk moras asu ne’e iha ona iha Indonézia tanba ne’e ita prevene liuhosi vasina. Entaun ita hakarak proteje ita-nia ema no animál sira husi moras ida-ne’e. Ho nune’e mak tékniku sira la’o ba iha munisípiu Covalima, Bobonaro, RAEOA no Dili. Entaun ohin ita simu no halo lansamentu komesa aban ba oin ita-nia vasinadór sira hahú bele la’o ona ba munisípiu haat hodi vasina ba asu sira”, nia esplika.
Governu Timor-Leste agradese ba Governu Austrália nia apoiu vasina hodi prevene moras raiva iha Timor-Leste.
Jornalista : Felicidade Ximenes
Editór : Zezito Silva
