DILI, 09 janeiru 2024 (TATOLI) – Ministériu Edukasaun (ME) haruka ona Inspetór no Diretór-Jerál Edukasaun no Ensinu hodi koordena ho Diretór Servisu Edukasaun munisípiu Baucau hodi koloka profesór husi eskola sentrál no filiál sira atu apoia prosesu aprendizajen ba estudante 151 iha Eskola Bázika Filiál (EBF) Osso-Uake ne’ebé daudaun ne’e laiha ona manorin.
Ministra Edukasaun, Dulce de Jesus, hatete problema EBF Osso-Uake iha postu administrativu Venilale ne’e konsidera sériu, tanba ne’e ministériu husu ona ba Edukasaun Baucau presiza halo liña koordenasaun ho parte Inspetór no Diretór-Jerál Edukasaun no Ensinu atu diskute hamutuk hodi identifika filafali profesór husi eskola sentrál no filiál ne’ebé agrupa ho EBF Osso-Uake ne’e hodi hanorin fali estudante sira.
Dulce de Jesus salienta katak iha profesór balun maka nia karga oráriu ne’e seidauk atinje oras 24 oras kada semana, nia bele bá hanorin tan iha EBF Osso-Uake, nune’e bele kompleta nia karga oráriu, tanba daudaun ME apoia subsídisu $25 ba manorin sira, entaun iha posibildade sira bele halo prosesu apendizajen ba alunu sira.
EBF Ossu-Uake ne’ebé antes ne’e eskola katólika ho profesór permanente na’in-tolu, maibé tanba mosu dezentendimentu iha eskola refere, entaun eskola ne’e taka tiha no no ikus mai eskola ne’e loke fali, maibé ninia estatutu muda fali ba eskola públika.
“Iha semana liubá kuandu mosu ona informasaun katak eskola ne’e ameasadu taka tanba estatutu profesór na’in-hitu ne’ebé hanorin ninia destinu termina iha dezembru, tanba profesór sira ne’e na’in-neen kontratadu no ida de’it mak permanente. Maibé, problema sira ne’e konsege rezolve no ikus mai mosu fali informasaun katak eskola EBF Osso-Uake ne’e agora laiha ona profesór, ne’ebé provizóriamente eskola ne’e labele hala’o ninia prosesu aprendizajen ba alunu 151 ne’ebé okupa sala aula neen”.
Relasiona ho kestaun ne’e, deputada bankada FRETILIN, Helena Martins Belo, preokupa ho desizaun Governu liuhosi Ministériu Edukasaun hodi hapara kontratu profesór kontratadu, nune’e prejudika prosesu ensinu aprendizajen iha eskola balun.
“Iha eskola ida iha Venilale, Osso-Uake, eskola bázika ne’e tenke taka tanba ho profesór kontratadu sira ne’ebé la kontinua kontratu, tanba profesór permanente ida de’it, entaun daudaun iha ne’ebá komunidade segel tiha ona eskola ne’e. Oinsá mak atu rezolve”, nia kestiona liuhusi reuniaun plenária foin lalais ne’e.
Notísia relevante: FRETILIN preokupa ME hapara profesór kontratadu-EBC Ossowake ameasadu taka – TATOLI Agência Noticiosa de Timor-Leste
Jornalista: Tomé Amado
Editora: Maria Auxiliadora
