Ministru Bendito Freitas la prezensa iha Tribunál husu konsentimentu Parlamentár

DILI, 09 janeiru 2024 (TATOLI) – Tribunál Judisiál Primeira Instánsia Díli (TJPID) submete ona pedidu ba Parlamentu Nasionál hodi husu autorizasaun, atu permite atuál Ministru Negósiu Estranjeiru no Kooperasaun, Bendito Freitas, hodi hatan iha Tribunál, tanba kazu krime kona-ba partisipasaun ekonomia no negósiu akontese iha V Governu Konstitusionál ne’ebé iha momentu referidu ministru asume hela pasta Ministru Edukasaun.

“Tribunál haruka ona karta ba Parlamentu Nasionál hodi husu ba Señor Bendito Freitas hodi marka prezensa iha Tribunál. Tanba Bendito Freitas agora asume hela kargu públiku hanesan Ministru Negósiu Estranjeiru no Kooperasaun ne’ebé agora halo hela servisu Estadu nian iha rai liur”, Juiza Julmiati Freitas deklara iha sala julgamentu Tribunál Judisiál Primeira Instánsia Dili, tersa ne’e.

Konteúdu hosi pedidu ne’e mós la haruka Parlamentu Nasionál atu hasai imunidade Ministru Bendito Freitas nian hanesan membru Governu, maibé husu konsentimentu.

“Tribunál nian pedidu ba Parlamentu ne’e la haruka Parlamentu Nasionál atu hasai imunidade Señor Bendito hanesan membru Governu, maibé iha pedidu ne’e husu konsentimentu hodi parlamentu autoriza de’it arguidu Bendito marka de’it prezensa iha ne’e”, Juiza realsa.

Tanba ne’e, TJPID iha tersa (9/1) husu atu labele realiza julgamentu kontinu ba krime partisipasaun ekonómia no negósiu ne’ebé envolve hosi arguidu Bendito Freitas no arguidu nain 10 seluk tanba arguidu Bendito Freitas la marka prezensa iha Tribunál.

Tribunál halo adiamentu ba kazu ne’e ba fali 15/7/2024 oras tuku 10 dader atu kontinua rona arguidu sira seluk.

Juiza dehan, prosesu ba kazu ida-ne’e envolve hosi Bendito Freitas nu’udar arguidu ba krime partispasaun ekonómia no negósiu ne’ebé envolve mós funsionáriu Ministériu Edukasaun balun  no empreza ne’ebé manán projetu ne’e.

“Kazu ida-ne’e Tribunál adia dala barak ona, dezde 2021, tanba Señor Bendito Freitas hanesan arguidu la marka prezensa iha Tribunál, kuandu arguidu ida la marka prezensa iha Tribunál mak sei labele halo julgamentu no tenke adia julgamentu ba prosesu ne’e”, nia afirma.

Tuir Konstituisaun RDTL moldura penál ne’ebé nia pena tinan lima mai kraik ne’e la presiza atu atu hasai imunidade, maibé marka prezensa de’it iha julagementu, bainhira hotu bele ba halo fali nia funsaun hanesan baibain.

Tanba ne’e, Tribunál fó prasu loron 10 atu parte Defeza hosi arguidu Bendito Freitas halo separasaun ba prosesu no kuandu halo ona mak parte Defeza sira tenke hato’o ba Tribunal kona-ba kestaun ne’e.

Hatan kona-ba kestaun ne’e, Defeza Bendito Freitas, Manuel Exposto, hato’o pedidu ba Tribunál hodi Tribunál bele separa arguidu Bendito Freitas hosi arguidu nain 10 seluk, tanba arguidu agora asume hela kargu públiku.

Defeza ba Bendito Freitas Advogado Privado Pedro Camões, husu ba Tribunál atu fó prazu loron 10, atu nia bele pronúnsia buat ruma kona-ba separasaun ba nia kliente Bendito Freitas tanba agora dadaun Parlamentu Nasionál seidauk pronúnsia buat balun enkuantu kona-ba arguidu sira seluk la iha problema no sira prontu hatán iha Tribunál.

Tuir faktu ne’ebé arolla hosi Ministériu Públiku katak kazu ne’e envolve hosi arguidu na’in 11 no inisiál BSF, AP, FMG, DC, ASP, JMGP, RHA, AFXR, LMR, MM, SS.

Arguido hirak ne’e servisu iha Ministériu Edukasaun, iha momentu V Governu Konstitusionál,  ne’ebé envolve ho atividade produsaun lista prezensa kaderneta nian, ne’ebé la tuir nia regra ne’ebé iha. No faktu ne’ebé iha hatudu katak empreza mak prodús de’it prezensa kaderneta husi pájina ida to’o pájina 36, maibé tuir loloos to’o iha pajina 40.

Tanba ne’e, ikus mai prezensa kaderneta ne’ebé distribui hosi Ministériu Edukasaun ba eskola téknika vokasionál, labele utiliza tanba la tuir akordu espesailizasaun kuantidade ba pajina nian.

Maske nune’e, arguidu sira kontinua halo prosesu pagamentu ba empreza hodi fó prezuiju ba Estadu. Ho aktu arguidu sira nian, Ministériu Públiku akuza arguidu sira BSF AP, FMG, DC, autór materiál ba krime abuzu poder ne’ebé previstu iha artigu 297.

Arguidu BSF, AP, FMG, DD, autór materiál ba krime partisipasaun ekonomia no negósiu ne’ebé previstu iha artigu 299 KP.

Arguidu ASP, JMGP, RHA, AFXR, LMR, MM no SS, autór materiál ba krime administrasaun danoza iha artigu 274.

Arguidu BSF, AP, FMG, DC, proibe atu azerse funsaun públika durante tinan 5, bazeia ba artigu 85 husi Kódigu Penál.

Prosesu ne’e, finalmente, adia husi juiz kolektivu, Jumiaty Freitas, Alvaro Maria, Jose Gonsalves, Ministériu Públiku reprezenta husi Prokuradór Rogerio Viegas, arguidu sira hetan asisténsia legál husi Defensór Públiku no Advogadu Privadu.

Audénsia ba jugamentu ne’e prezidente hosi Juiza Julmiati Freitas, Juiz José Gonsalves no Alvaro Maria Freitas.

Jornalista: Natalino Costa

Editór : Zezito Silva