DILI, 09 janeiru 2024 (TATOLI)—Empreza Pelican Paradise daudaun ne’e utiliza ekipamentu pezadu hosi empreza lokál sira hodi halo projetu konstrusaun Dili sidade istóriku iha zona entre Tasi-tolu no Tibar.
“Ami koopera ho empreza Arquiris hodi utiliza sira-nia ekipamentu pezadu tanba ami-nia objetivu maka hakarak loke vaga serbisu ba timor-oan sira hodi haburas ekonomia nasaun. Ami deside la lori ekipamentu sira hosi rai-li’ur mai, tanba ekipamentu ne’ebé daudaun ami presiza, iha Timor mós iha,” Diretór Ezekutivu Pelican Paradise, Jeremiah Chan, informa ba Agência Tatoli, iha nia knaar fatin, Timor Plaza, tersa ne’e.
Ekipamentu sira ne’ebé iha Timor laiha maka sei lori hosi rai-li’ur.
“Ekipamentu ne’ebé tuir ami-nia hakarak no kualidade ba otél fitun lima ne’e iha Timor laiha, entaun ami tenke importa hosi rai-li’ur,” nia akresenta.
Notísia relevante : Kontrusaun otél pelican paradise adia ba tinan 2024
Daudaun ne’e serbisu ne’ebé empreza halo la’ós iha Tasi-tolu maibé iha parte Tibar nian.
“Ami halo komponente balun komesa hosi foho leten no ami mós kontinua ateru rai iha parte kraik tasi-ibun nian, iha foho leten ami halo uma ida sai hanesan ezemplu para ami ko’alia kona-ba estandar serbisu, katak problema iha ne’ebé, falta iha ne’ebé ami bele buka solusaun. Ami mós halo galeria ida iha foho leten, no ateru rai hodi kuda ai hodi labele provoka rai monu,” nia esplika.
Diretór empreza lori Pelican Paradise nia naran, agradese ba IX Governu ne’ebé daudaun koopera di’ak tebes, liu-liu dada bee-moos no ahi eletrisidade.
Empreza internasionál ne’e sei halo konstrusaun otél, apartamentu no rezidénsia hamutuk unidade 287 ho kustu orsamentu millaun $100. Iha faze dahuluk, empreza Malázia ne’e sei hahú projetu iha rai ektare 16, ne’ebé tuir planu sei finaliza iha tinan 2024.
Pelican Paradise haree iha área dezenvolvimentu propriedade hodi halo dezeñu no kalkulasaun kustu, enkuantu ba implementasaun loke konkursu públiku.
Empreza sei dezenvolve área ospitalidade, turizmu no seluk tan atu atrai turista sira mai vizita nasaun ne’e.
Faze dahuluk projetu ne’e, empreza sei hahú konstrusaun hodi hein Governu rezolve okupante iha área Tasi-tolu, hafoin empreza kontinua projetu faze daruak.
Tuir planu, Pelican Paradise sei halo dezenvolvimentu turíztiku ho investimentu millaun $700 iha rai ektare 558, iha zona entre Tasi-tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun kampu traballu ba ema 1.500 iha faze konstrusaun no kampu traballu permanente hamutuk 1.300.
Jornalista : Antónia Gusmão
Editora : Julia Chatarina
