DILI, 20 Novembru 2023 (TATOLI)-Prezidente Grupu Pelican Paradise, Datuk Edword Ong, segunda ne’e, hasoru malu ho Primeiru-Ministru, Kay Rala Xanana Gusmão, hodi informa kona-ba prosesu konstrusaun Otél fitun lima Pelican Paradise iha aréa Tasi-Tolu Dili sei adia fali ba tinan 2024.
Projetu konstrusaun otél Pelican Paradise ne’e lansa ona hosi Prezidente Repúblika, José Ramos Horta, no hetan ona bensaun hosi Eminénsia Dom Virgílio Cardeal do Carmo da Silva iha área Tasi-Tolu, Díli, iha loron 25 fulan-novembru 2022.
Notísia Relevante :Pelican Paradise relata progresu serbisu ba PR Horta
“Senhor Datuk Edword Ong mai informa katak projetu Pelican Paradise 2024 mak foin komesa ne’ebé ita hein sira bele hala’o lalais,” Xanana hateten ba jornalista sira iha Gabinete Fronteira Maritima, Dili, segunda ne’e.
Xefe Governu agradese ba Prezidente Grupu Pelican Paradise, Datuk Edword Ong, ne’ebé hala’o vizita mai Timor-Leste hodi ko’alia kona-ba prosesu implementasaun projetu ne’e iha tinan oin hodi kontribui ba dezenvolvimentu Timor-Leste.
Iha fatin hanesan Prezidente Grupu Pelican Paradise, Datuk Edword Ong, hateten investimentu ba projetu Pelican Paradise ne’e nu’udár projetu super-modernu hanesan mós ho nasaun seluk nian tuir loloos hala’o ona maibé empreza presiza prepara uluk kondisaun tékniku sira foin bele implementa servisu fiziku ne’e.
Daudaun ne’e, nia esplika preparasaun tékniku to’o ona faze II, tanba faze primeiru konklui ona, nune’e faze rua remata sei kontinua hakat ba faze III antes implementa projetu ne’e iha tinan 2024. Tuir nia bainhira projetu ne’e implementa ona iha primeiru faze sei fó servisu ba ema rihun ida.
Governu Timor-Leste rasik fasilita ona asinatura hosi SIA (Akordu Investimento Espesial) fó bá sira hanesan konfiansa ida atu hahú tau ona konsiderasaun nune’e bele implementa lalais.
Entertantu, antes ne’e, iha loron 31 outubru 2023, Prezidente Bee Timor-Leste (BTL), Carlos HEALIN, dehan parte rua halo akordu hodi prepara bee-moos atu implementa projetu Pelican Paradise.
“Ita iha koordenasaun di’ak ho sira (Pelican Paraizu) no inklui mós Tradelnvest. Ulukliu ami fó opsaun rua ba sira. Primeiru, BTL sei fornese sistema bee moos ida husi Liquiça ne’ebé agora daudaun ami forñese hela ba Portu Tibar no segundu ami halo ona drilling hodi kompleta identifika katak bee ne’e apropriadu ba prosesu konstrusaun,” nia hateten.
Notísia Relevante :Progresu serbisu Pelican Paradise: Konklui prosesu konkursu no serbisu la’o hela
Jornalista : Osória Marques
Editór : Agapito dos Santos
