DILI, 23 outubru 2023 (TATOLI) – Prezidente Pelican Paradise Group Edward Ong informa katak empreza halo ona serbisu barak no iha ona progresu. Serbisu hirak ne’e mak konkluzaun ba prosesu konkursu iha fulan fevereiru, antesipa iha terrenu no daudaun ne’e serbisu la’o hela.
“Bainhira lansamentu iha fulan-novembru 2022, ami hamoos tasi-ibun, agora ami kontrola atu ema la tau fo’er arbiru, la’ós bandu ema halo movimentu iha ne’ebá”, Prezidente Pelican Paradise Edward Ong hateten ba jornalista sira hafoin hasoru malu ho Prezidente Repúblika, iha Palásiu Prezidensiál, Bairru-Pité, Dili, segunda ne’e.
Projetu ne’e bainhira ramata mak benefísiu sira mak sei sai sidade no sanitária di’ak, la hamosu inundasaun.
Notísia relevante : EDTL fornese ona enerjia elétrika iha área projetu Pelican Paradise
Prezidente Pelican ne’e informa, orsamentu ne’ebé antesipa utiliza ba projetu ne’e sei boot liu, ezemplu ba faze dahuluk mak millaun $200-resin maibé agora besik millaun $500. “Totál projetu parese tuir folin agora. Ami-nia kalkulasaun agora liu billaun $1”, nia dehan.
Nia hatutan, vizaun hanesan ho Governu atu halo projetu ne’e bele hotu ho lalais no mós hadi’a tan ambientál inklui sei kria empregu ba timoroan sira.
Iha parte seluk, Prezidente Repúblika José Ramos Horta preokupa ho Projetu Pelican Paradise ne’ebé la’o tarde tanba Governu laiha seriedade hodi fó dalan ba kompaña aselera servisu.
“Projetu ne’e demora tanba iha problema, kle’ur ona sira husu ba Governu iha buat rua ne’ebé tuir kontratu haruka, iha kontratu ne’e ko’alia ho Governu mak dada eletrisidade ba fatin projetu, kompaña mak selu maibé presiza Governu mak dada ba, hanesan mós bee-moos to’o agora Governu la dada ba, entaun halo buat ne’e la’o demora”, Xefe Estadu ba jornalista sira iha Palásiu Prezidensiál hafoin ramata ho Prezidente Pelican Paradise Edward Ong.
Horta hatete, iha rai hotu bainhira atu harii investimentu boot, Governu iha responsabilidade ba infraestrutura ne’ebé investór presiza no bazeia ba kontratu.
“Kinta agora ha’u hasoru Primeiru-Ministru Maun-Boot Xanana, ha’u sei ko’alia ho nia tanba pedidu halo dala barak ona ba membru Governu maibé sira la responde, projetu ne’e la’o demora tanba ida-ne’e, bee-moos ho eletrisidade, agora ita ba duun fali investór mak demora”, Horta dehan.
Notísia relevante: Governu no Pelican Paradise selebra akordu investimentu espesiál
Jornalista: Hortencio Sanchez
Editór : Zezito Silva
