DILI, 09 outubru 2023 (TATOLI)—Eletricidade de Timor-Leste, Empreza Públika (EDTL, E.P), fornese ona enerjia elétrika ba área projetu empreza Pelican Paradise, hanaran Dili Sidade Istórika, ne’ebé lokaliza iha Tasi-tolu.
“Daudaun EDTL instala ona trafo rua hodi fasilita sira halo konstrusaun. Instalasaun ba trafo 1 mega watt hotu ona nomós trafo seluk 150 GB, ne’ebé monta tiha ona ba sira-nia edifísiu ne’ebé uza sai hanesan baze jestaun administrasaun nian,” Prezidente Konsellu Administrasaun EDTL, E.P, Paulo da Silva hateten, iha Hotel Timor, segunda ne’e.
Notísia relevante : Pelican Paradise sei anunsia empreza manán-na’in iha marsu
Nia dehan, instalasaun daudaun ne’e uza ba prosesu konstrusaun, nune’e bainhira ramata hotu sira presiza totál enerjia mega watt 18.
“Sira selu, la’ós gratuita, selu depende ba uza,” nia konfirma.
Pelican Paradise haree iha área dezenvolvimentu propriedade hodi halo dezeñu no kalkulasaun kustu, nune’e ba implementasaun sei loke konkursu públiku.
Empreza Malázia ne’e sei halo konstrusaun otél, apartamentu no rezidénsia hamutuk unidade 287 ho kustu millaun $100, ne’ebé iha faze dahuluk sei hahú projetu iha rai ho medida ektare 16, ne’ebé tuir planu sei finaliza iha tinan 2026.
Aleinde ne’e, empreza sei dezenvolve área ospitalidade, turizmu no seluk tan atu atrai turista sira mai vizita Timor. Iha faze dahuluk projetu ne’e, empreza nafatin hein Governu halo libertasaun terrenu iha área Tasi-tolu, hafoin kontinua projetu faze daruak.
Pelican Paradise mós sei halo dezenvolvimentu turístiku ho totál investimentu millaun $700. Área dezenvolvimentu turístiku tuir planu sei harii iha rai ektare 558, iha zona entre Tasi-tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun postu traballu ba ema 1.500 iha faze konstrusaun no 1.300 postu traballu permanente.
Jornalista : Antónia Gusmão
Editora : Julia Chatarina
