DILI, 10 fevereiru 2023 (TATOLI) – Diretór-Ezekutivu Pelican Pradise, Jeremiah Chan, hatete projetu konstrusaun Pelican Paradise loloos hahú ona hafoin lasamentu fatuk dahuluk, maibé seidauk bele realiza tanba sei hein fó sai empreza vensedora ba obra refere iha marsu.
“Bainhira iha ona empreza manán-na’in maka bele ona halo konstrusaun no projetu ne’e sei lori tempu fulan 36 ka tinan tolu”, Jeremiah Chan dehan ba Agência Tatoli, iha kna’ar fatin Timor Plaza, sesta ne’e.
Dirijente ne’e esplika empreza sira ne’ebé tuir konkursu hasoru difikuldade hodi prepara dokumentu, nune’e sira husu Pelican Paradise atu estende tan tempu ba sira hodi prepara sira-nia aan partisipa iha konkursu. “Ne’ebé ami estende tan to’o iha loron 15 fevereiru 2023”, Jeremiah Chan afirma.
Bainhira empreza sira hatama hotu ona dokumentu, Pelican presiza tempu fulan ida hodi avalia dokumentu sira, nune’e iha marsu 2023 anunsia ofisialmente empreza vensedora.
“Empreza loke ona konkursu ba estrada no galeria. Ida ne’e ami simu dokumentu hosi empreza sira ne’ebé kompete to’o 15 fevereiru 2023. Kontrusaun ne’e hahú tempu badak tanba projetu ki’ik, ne’ebé ami sei analiza dokumentu sira lalais de’it”, nia esklarese.
Nia salienta, molok realiza konstrusaun empreza sira ronova lisensa ambientál tanba iha validasaun tinan rua de’it.
“Importante tebes atu renova lisensa ambientál tanba lisensa ne’ebé ami halo akordu investimentu seidauk asina, ne’ebé presiza renova atu tuir akordu investimentu ne’ebé asina ona entre Governu no empreza rasik. Ami hakarak konstrusaun ne’e lalais ona, tanba sei hein prosesu sira ne’e maka seidauk bele”, nia klarifika.
Bainhira husu kona-ba empreza hira mak submete dokumentu hodi partisipa iha konkursu, diretór-ezekutivu ne’e dehan seidauk bele publika sai.
Daudaun iha terrenu seidauk iha mobilizasaun ekipamentu ruma, maibé Pelican kontrata hela empreza lokál no ONG lokál balun hodi kuda ai iha fatin sira ne’ebé presiza. Aleinde ne’e, lori mós empreza sira ne’ebé hatama dokumentu bá haree direta iha terrenu.
“Tuir loloos difikuldade boot ne’e laiha, maibé molok hahú konstrusaun ami sei instala eletrisidade no dada bee-moos, tanba ne’e maka ami ko’alia ona ho autoridade BTL nian”, nia konklui.
Pelican Paradise sei halo konstrusaun otél, apartamentu no rezidénsia hamutuk unidade 287 ho kustu orsamentu millaun $100. Iha faze dahuluk, empreza Malázia ne’e sei hahú projetu iha rai ektare 16, ne’ebé tuir planu sei finaliza iha tinan 2026.
Pelican Paradise haree iha área dezenvolvimentu propriedade hodi halo dezeñu no kalkulasaun kustu, enkuantu ba implementasaun loke konkursu públiku.
Projetu ne’e sei dezenvolve área ospitalidade, turizmu no seluk tan atu atrai turista sira mai vizita nasaun ne’e. Iha faze dahuluk projetu ne’e, empreza sei hahú konstrusaun hodi hein Governu rezolve okupante iha área Tasi-Tolu, hafoin kontinua projetu faze daruak.
Tuir planu, Pelican Paradise sei halo dezenvolvimentu turístiku ho investimentu ho montante millaun $700.
Área dezenvolvimentu turístiku ne’e tuir planu sei harii iha rai ektare 558, iha zona entre Tasi Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun postu traballu ba ema 1.500 iha faze konstrusaun no 1.300 postu traballu permanente.
Notísia relevante : https://tatoli.tl/2022/11/25/pr-no-pm-halo-lansamentu-fatuk-dahuluk-konstrusaun-otel-fitun-lima-pelican-paradise/
Jornalista: Antónia Gusmão
Editora: Maria Auxiliadora
