iklan

EKONOMIA, HEADLINE

PR no PM halo lansamentu fatuk dahuluk konstrusaun otél fitun-lima Pelican Paradise

PR no PM halo lansamentu fatuk dahuluk konstrusaun otél fitun-lima Pelican Paradise

Prezidente Pelican Paradise, Datuk, Dr, Edward Ong, hatudu hela miniature foun investimentu Pelican Paradise ba Prezidente Repúblika, José Ramos Horta, Primeiru-Ministru, José Ramos Horta, Dom Virgilio Kardeál Do Carmo da Silva, inklui entidade relevante seluk, iha Tibar, sesta (26/11). Imajen/MTKI

LIQUIÇÁ, 25 novembru 2022 (TATOLI)—Prezidente Repúblika (PR), José Ramos Horta, hamutuk ho Primeiru-Ministru, Taur Matan Ruak, no Prezidente Pelican Paradise Datuk, Dr, Edward Ong, asina plaka no halo lansamentu fatuk dahuluk ba futuru konstrusaun otél fitun-lima Pelican Paradise, iha suku Tibar, postu administrative Bazartete, munisípiu Liquiçá.

“Ha’u kontente empreza Pelican Paradise ohin loron konsege halo lansamentu fatuk dahuluk ba konstrusaun futuru otél fitun-lima. Ha’u akompaña invenstimentu no projetu ne’e iha ona tinan lubuk ida nia-laran, maibé ohin loron halo ona lansamentu fatuk dahuluk. Ida-ne’e ajuda tebes Timor-Leste, liuliu fó serbisu ba ita-nia joven sira tanba investimentu ne’e boot,” PR Horta hateten liuhosi nia diskursu iha ámbitu serimónia lansamentu fatuk dahuluk, iha Tibar.

Notísia relevante: Governu no Pelican Paradise selebra akordu investimentu espesiál

Nia konsidera, investimentu ne’e la’ós fó serbisu de’it ba joven timor-oan, maibé mós fó oportunidade ba empreza timor-oan balun.

“Ha’u orgullu tebes ba otél fitun-lima tanba nia hanesan otél boot sira iha Dubai, Singapura. Otél ne’e rasik sei iha restaurante haat no sei iha mós portu peska, ne’ebé empreza Pelican Paradise mak sei entrega ró peska ba peskadór sira mai fa’an fali ba otél. Ida-ne’e ha’u hanoin timor-oan barak sei hetan oportunidade serbisu,” Horta louva.

Iha fatin hanesan, Eis Primeiru-Ministru, Marí Alkatiri, kontente tanba ohin loron Estadu no Governu Timor-Leste bele hamutuk ho empreza halo lansamentu ba fatin ne’e, tanba iha tinan 2017, VII Governu Konstitusionál fó ona sertifikadu investidór ba empreza no ohin loron konsege halo ona lansamentu.

Notísia relevante: Timor-Leste Atribui Ona Sertifikadu Investimentu ba Pelican Paradise

“Espera ba oin serbisu bele la’o lais tanba Timor-Leste presiza fatin ne’ebé mundu hatene. Projetu ne’e rasik iha impaktu pozitu tebes ba ita, tanba loke dalan ba turizmu ho kualidade, signifika reseita mós tama, tanba ita hatene rai barak moris de’it ho turizmu, enkuantu Timor-Leste nia turizmu potensialidade boot, hahú hosi turizmu komunitáriu to’o turizmu boot no kualidade,” Marí tenik.

Nia dehan, liuhosi Pelican Pardise, ba oin bele loke dalan mós ba investimentu seluk, tanba ne’e Timor-Leste tenke loke odamatan ba investidór sira, nune’e konfiansa sei mai.

Prenda boot ba investimentu

Nune’e mós, Ministru Koordenadór Asuntu Ekonómiku (MKAE), Joaquim Amaral, konsidera inventimentu Pelican Paradise hanesan prenda boot ida ba dezenvolvimentu ekonómiku Timor-Leste, liuliu iha setór turizmu tanba investimentu ne’e iha otelaria ne’ebé korresponde ona ho Governu nia planu ba diversifikasaun ekonómia.

Dezeñu foun investimentu Pelican Paradise. Imajen/MTKI

“Setór turizmu hanesan pilár importante ida atu tau atensaun, nune’e ho situasaun ida-ne’e fó sinál di’ak ba ekonomia, katak ita-nia ekonomia hahú book-an daudaun ona ho investimentu sira ne’e,” nia observa.

Prezidente Pelican Paradise, Dr, Edward Ong, hato’o agredesimentu ba líder nasaun sira ne’ebé tau ona fiar hodi asina konkordánsia projetu inisiál iha outubru 2008.

“Xanana nia domin ba nasaun doben Timor-Leste no vizaun admirável tebes, tanba liuhosi fiar ne’e hafanun ami atubele kaer metin espíritu no intensaun hosi Akordu Investimentu Espesiál (SIA) to’o ohin loron. Asinatura SIA fó mai ami konfiansa atu hahú tau konsiderasaun iha dezeñu foun no ekspetasaun hosi turista sira, hafoin pandemia no ekspetasaun hosi Timor-Leste ne’ebé atu tama ba Asosiasaun País Sudeste Aziátiku (ASEAN, sigla inglés) iha tinan 2023,” Edward Ong, tenik.

Nia dehan, Pelican Paradise junta ona plot 3 dezignadu ba 228 servisu apartementu, ne’ebé koñesidu hanesan The Aery, fó xave 624 no plot 10 dezignadu ba Resort Hotel, kuñesidu hanesan Pelican Paradise Resort, ne’ebé fé xave 303 no villa 10 hanesan faze dahuluk, totalmente fó Pelican Pardise, xave 927, villa 10, presidential suite ida, pent house haat, no sei iha uma ba Xefe Estadu ida, inklui dalan tama privadu no seguru.

The Aery sei iha levadór privadu no kuartu toba ba individuál tolu no haat levadór kabuar to’o iha sky garden no roof garden. Pelican Paradise Resort sei iha ballroom ka salaun enkontru boot ba vizitante 1040, salaun enkontru 11, VIP lobby, klubu privadu ba deskansa metru kuadradu 7.087, fatin arte no gym metru kuadradu 30.000, pisina borda infinita metru 50, spa própriu ba fasilidade fitun-lima, kobre hosi kampu tennis no klubu ba labarik sira.

Tau atensaun ba ambiente

Tuir Responsável investimentu ne’e, Aery no Pelican Paradise Resort, sei fó serbisu ba ema 1.000 iha faze dahuluk no dezenvolvimentu ne’e tau atensaun maka’as hodi haforsa liután ambiente.

“Ami halo ona integrasaun 5 MW hosi solár panel, forsa solár RO sei konverte bee tasi ba bee potavel hodi reforsa tan bee ne’ebé fornese hosi autoridade, ba área drainajen sei resikla hodi uza fali hanesan bee ba jardín nian. Jestaun kompleksu tomak kometidu ba zero plástiku no prepara fatin karrega karreta elektróniku ne’ebé antisipa karik Timor-Leste sei uza hanesan saida maka ami haree iha nasaun dezenvolvidu sira. Nune’e, bainhira no tempu saida de’it posível ami sei la uza ona kombustível,” nia salienta.

Entretantu, investimentu ne’e sei kompleta ho dezenvolvimentu iha lote 19, iha rai ektare 556 resin, ne’ebé lokaliza entre Tasi-tolu no Tibar.

Iha faze dahuluk, iha bloku ida mak harii uluk otél no apartamentu, enkuantu bloku seluk halo reflorestasaun ba foho sira.

Bainhira asina akordu dahuluk iha tinan 2008, empreza halo estimatimasaun katak dezenvolvimentu ne’e bele gasta to’o millaun $250, maibé tanba atrazu implementasaun no revizaun ba planu sira, maka kálkulu osan ne’ebé sei gasta aumenta.

Notísia relevante: SEA Sei Monitoriza Projetu Pelican Paradise Hodi Minimiza Risku Ambiente

Aleinde ne’e, iha área konstrusaun, reforestasaun, agrikultura, no kampu golf kobre 82% no otél no komersiál sira 18%.

Proposta investimentu empreza internasionál hosi Malázia ne’e hahú kedas iha tinan 2008, iha V Governu Konstitusionál ninia tempu, ne’ebé antes ne’e lidera hosi Primeiru-Ministru, Kay Rala Xanana Gusmão.

Nune’e, Governu hasai rezolusaun númeru 33/2015, 05 outubru no aprova hodi hahú konstrusaun, ne’ebé kontratu empreza ho Governu iha inisiál ba tinan 50 no posibilidade sei renova ba tinan 50.

Pelican Paradise sei sai mother company ba empreza hamutuk 20 hosi nasaun Singapura no Malázia, ne’ebé sei hamutuk implementa projetu boot ne’e.

Antes ne’e, iha loron 22 janeiru 2018, VII Governu Konstitusionál atribui ona sertifikadu investimentu ba empreza estranjeiru ne’e hodi halo investimentu turístiku.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!