VIQUEQUE, 09 janeiru 2024 (TATOLI)—Profesór kontratadu hosi Viqueque hamutuk na’in-155 hosi eskola 15 termina kontratu no seidauk iha komunikasaun ruma atu extende kontratu.
“Ita-nia profesór hamutuk na’in-155 maka asina kontratu iha abríl 2023, foin lalais Ministériu Edukasaun Juventude no Desportu (MEJD) fó ona avizu katak sira-nia kontratu ramata iha loron 31 dezembru 2023, nune’e daudaun sei fó impaktu ba eskola 15 tanba profesór sira mesak kontratadu maka hanorin iha ne’ebá,” Diretór Servisu Edukasaun munisípiu Viqueque, Domingos Brandão, informa ba Agência Tatoli, iha ninia knaar fatin, Beloi, kuarta ne’e.
Profesór ne’ebé termina ona kontratu maioria hanoria iha área rurál, ne’ebé bele implika ba eskola sira iha prosesu aprendizajen labele la’o tanba laiha profesór atu koloka hodi substitui profesór sira ne’ebé kontratatu ramata.
“Ita mehi hadi’a kualidade profesór maibé daudaun hapara fali sira-nia kontratatu. Se ministériu halo fali rekrutamentu karik tenke sedu tanba bainhira tarde bele prejudika eskola sira-ne’ebé daudaun ho númeru profesór menus ne’e,” nia tenik.
Notísia relevante : FRETILIN preokupa ME hapara profesór kontratadu-EBC Ossowake ameasadu taka
Eskola ne’ebé lokaliza iha área rurál, ne’ebé iha profesór kontratadu mak hanesan Ensinu Báziku Filiál (EBF) Uaimori Viqueque Vila profesór hela na’in-haat klase 1 to’o 6, EBF Bibileo profesor na’in-ualu klase 1 to’o 9, EBF Fernando Lasame profesor na’in-haat klase 1 to’o 6, EBF Uefia profesor na’in-rua klase 1 to’o klase 4, EBF Aimanas Rai, suku Luca profesór na’in-haat klase 1 o’o klase 9, EBF Nuntetuk Lacluta profesor na’in-ida klase 1 to’o 6,
Nune’e mós, EBF Osokaiua Uatulari profesór na’in-ida klase 1 to’o 6, EBF Tula Oli Ossu profesór kontratadu haat klase 1 to’o klase 9, EBF Uaitonu Ossu profesór na’in-tolu, klase 1 to’o 6 no EBF Uatukila Bibileo profesor na’in-rua klase 1 to’o klase 6.
Pré-eskolár Bibileo profesór ida klase A no B, Pré-eskolár Beaço profesór na’in-ida, Pré-eskolár Leki Gari profesór na’in-ida klase A no B no Pré-eskolár Santa Lurdes Luka profesór na’in 1 klase A no B.
Tuir Diretór, loloos ne’e ministériu tutela kontinua fó de’it kontratu ba profesór sira akompaña halo avaliasaun atu nune’e bele kontinua hanorin iha eskola sira tanba daudaun sira hanesan kontratadu hotu, entaun eskola bele la la’o tanba iha eskola sira-ne’e profesór permanente iha ida to’o rua de’it.
“Tanba ne’e, ha’u informa ona ba ministériu hodi haree asuntu sira-ne’e hodi rezolve lalais, nune’e bele hanorin estudante sira. Profesór sira hetan kontratu tuir nesesidade eskola la’ós polítika no profesór sira-ne’e balun uluk voluntáriu tinan naruk, hafoin iha tinan 2023 maka foin hetan kontratu, maibé agora kontratu hotu tan ona,” nia hato’o.
Hosi Servisu Edukasaun labele halo buat ida hodi defende profesór sira no sei rona desizasaun hosi ministériu entre kontinua ka loke rekrutamentu.
“Ami labele halo buat ruma, ami hein de’it desizaun hosi ministériu maka bele deside, maibé tenke aselera prosesu sira ne’e atu eskola labele sai abandonadu,” Diretór fó hanoin.
Dadus profesór permanente iha munisípiu Viqueque hamutuk na’in-1.261.
Jornalista : Vitorino Lopes da Costa
Editora : Julia Chatarina
