COVALIMA, HEADLINE

Despaixu ME orienta eskola sekundária sira simu estudante ho limite

Despaixu ME orienta eskola sekundária sira simu estudante ho limite

Diretór Servisu Edukasaun Covalima, Francelino Freitas Carvalho. Imajen Tatoli/Celestina Teles.

COVALIMA, 10 janeiru 2023 (TATOLI) – Despaixu ho númeru 31/XII/GME/2023 husi Ministériu Edukasaun (ME) husu ba eskola sekundária sira atu simu estudante foun ho númeru ne’ebé mak limite.

Diretór Servisu Edukasaun Covalima, Francelino Freitas Carvalho, hatete bazeia ba despaixu refere maka Eskola Sekundária Jerál Públiku Suai iha tinan 2024 simu estudante 540, Eskola Sekundária Fohorem 90, Zumalai 270 no Eskola Tékniku Vokasionál Akar Laran 350.

“Ita Simu despaixu husi Ministériu Edukasaun katak limita simu estudante sira no simu bazeia ba númeru ne’ebé maka ministériu define ona”, Francelino Carvalho haktuir ohin.

Ho ida ne’e maka masi inan no aman estudante sira hato’o lamentasaun kona-ba despaixu ne’e ba iha Servisu Edukasaun Covalima, maibé labele foti dezisaun ruma tanba kumpre de’it desizaun husi ministériu.

Reprezentante inan no aman, Micael Agus Neno, afirma katak estudante hato’o protesta ba Edukasaun Covalima relasiona ho despaixu Ministériu Edukasaun hodi limita simu estudante. Tanba ne’e nia husu ba ministériu hodi hanoin didi’ak bainhira hatún despaixu refere.

“Despaixu orienta ba eskola sira simu estudante ho limitasaun. Agora, ami-nian oan sira atu eskola iha ne’ebé?”, nia kestiona.

Iha Covalima eziste eskola hamutuk 72, kompostu husi  Eskola Bázika Sentrál 24, Sekundária lima, Eskola Tékniku Vokasionál neen no Pré-eskolár 43- husi númeru ne’e pré-eskolár privadu 10 no públiku 33.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!