iklan

HEADLINE, INKLUZAUN SOSIÁL

Governu halo ajustamentu rejime jurídiku pensaun sosiál invalidés no ferik-katuas

Governu halo ajustamentu rejime jurídiku pensaun sosiál invalidés no ferik-katuas

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (10/01/2024). Imajen Tatoli/Francisco Sony

DILI, 10 janeiru 2024 (TATOLI)Governu liuhosi reuniaun Konsellu Ministru (KM) ordinária, kuarta ne’e, aprova ona projetu dekretu-lei, ne’ebé aprezenta hosi Vise-Ministra Solidariedade Sosiál no Inkluzaun, Céu Brites, kona-ba alterasaun dahuluk dekretu-lei númeru 53/2022, loron 20 jullu, ne’ebé aprova rejime jurídiku ba pensaun sosiál invalidés no ferik-katuas iha ámbitu rejime la kontributivu seguransa sosiál.

“Diploma ida-ne’e ho objetivu atu revee fórmula ba kálkulu montante pensaun kada fulan, iha ámbitu rejime la kontributivu ba seguransa sosiál, tanba haree katak maski valór ida ne’ebé fiksa ona tuir referénsia limite liña pobreza internasionál, maibé iha nesesidade halo ajustamentu boot liu ba realidade nasionál,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.

Notísia relevante : Governu halo ona pagamentu pensaun sosiál ba idozu-invalidéz 90.552

Alterasaun ne’e, liu-liu kona-ba ema ho idade avansadu liu no tanba ida-ne’e mós ho difikuldade asesu boot tebes ba rendimentu sira seluk no ho problema saúde boot liu.

Ho diploma ida-ne’e, prestasaun sosiál ida-ne’e mós sei la akumula ho rendimentu hosi serbisu ba ema hotu no la’ós ba de’it pensionista foun sira hanesan molok ne’e define ona, sein prejuízu hodi garante direitu ne’ebé hetan ba prestasaun ne’ebé selu ona.

Ho Dekretu-Lei ida-ne’e, valór diáriu ne’ebé konsidera hanesan valór mínimu hodi moris ho dignidade, ne’ebé Governu prevee ona tuir liña pobreza no situasaun ekonómika, sa’e ba montante $2, ne’ebé rezulta valór mensál $60.

Aleinde ne’e, sei aumenta valór ida ho $20 ba sidadaun sira ho idade hosi 70 to’o 79, no $40 ba sidadaun sira ho idade 80 liu.

Jornalista      : Antónia Gusmão

Editora           : Julia Chatarina

iklan
iklan

Leave a Reply

iklan
error: Content is protected !!