DILI, 10 janeiru 2024 (TATOLI)–Klube Northern Crocs halakon klube AD SLB Laulara ho skor 2-0 iha kontinuasaun jogu taxa Timor CUP 2023 ne’ebé hala’o iha Kampu Futeból, Melbourne-Austrália, iha kuarta ne’e.
Maski lakon ho Northern Crocs, maibé ekipa AD SLB Laulara kontinua hakat ba jogu semi finál hodi hasoru klubu jigante hirak ne’ebé sei kompete malu.
AD SLB Laulara lakon ho adversáriu Northern Crocs 2-0, tanba iha etapa dahuluk jogu hahú mosu fallansu bola maun (Hand ball), nune’e árbitu deside pinaltu hodi ekipa advensáriu tama uluk golu hodi muda skor 1- 0, to’o jogu etapa dahuluk ramata.
Notísia relevante : Kay Olok Cs lori AD SLB ‘ukun’ Craigieburn Pythons ho golu 11
Iha etapa daruak, ekipa AD SLB kontinua hakas a’an atu hatama golu, maibé jogadór avansadu sira hosi AD SLB Lualara kontinua lakon oportunidade bola barak, ikus mai ekipa Adversáriu hatama tan golu ida hodi termina jogu ho skor 2-0.
Haree ba asuntu ne’e, Kapitaun AD SLB Laulara, Efrem Santos kontinua hato’o agradese ba ekipa SLB maski halo esforsu ataka razada hasoru adversáriu, maibé lakon iha parte tékniku no fíziku, tanba klubu Northern Crocs nu’udar uma-na’in ba Jogu Timor CUP ne’ebé kuaze ninia jogadór iha ona esperiénsia barak liu.
“Ha’u hanoin jogu ne’e hanesan ita-nia sorte mak laiha, tanba iha jogu primeira faze ita lakon ho penalte 1-0, maibé ita-nia ekipa halo nafatin esforsu ataka maka’as to’o segundu parte mós koko atu hatama golu, maibé lakon bola maka barak, tanba ida-ne’e ita hasoru ekipa uma-na’in, maibé ita-nia ekipa la lakon esperansa no kontinua halo esforsu para tama nafatin semi finál hodi halo preprasaun di’ak liu hasoru klubu hirak ne’ebé ita hasoru,” Efrem Santos, hateten.
Nia dehan, maski lakon, maibé ekipa AD SLB hatudu nafatin disiplina hodi kumpre regra hotu durante jogu to’o ramata nu’udar pasu importante hametin kooperasaun ho klubu hirak ne’ebé AD SLB hasoru bele aprende jogu hodi hatudu ida-idak ninia tátika oinsá domina bola no hatama golu hodi rekolla vitória atubele hetan oportunidade tátika no tékniku oin-oin.
Entretantu, daudaun ne’e, Jogadór estrela klubu AD SLB Laulara Kay Olok Gusmão marka golu lima hafoin nia ekipa manán Craigieburn Pythons ho skor 11-1 no daudaun ne’e Kay Olok hatama golu 6, tanba antes ne’e mós Kay Olok marka mós golu 1 durante jogu hasoru Klubu Timor-Leste Galaxy United.
Jornalista : Antónia Gusmão
Editora : Julia Chatarina
