Membru PN husu MOP fó atensaun ba estrada Tasi-Tolu ba Maslidun
DILI, 10 janeiru 2024 (TATOLI)—Membru Parlamentu Nasionál (PN) husu ba Ministériu Obras Públika (MOP) atu atensaun ba kondisaun estrada ne’ebé kondisaun ladi’ak iha Kapitál Dili, hanesan iha Tasi-Tolu ba Maslidun, Bebonuk, Perumnas Bairru Pite ho fatin sira seluk tan.
Prezidente Komisaun E trata asuntu Infraestrutura iha Parlamentu Nasionál (PN), Deputadu Marcos Xavier, husu MOP atu atensaun ba estrada urbana ne’ebé kondisaun aat to’o agora seidauk halo normalizasaun.
“Estrada trosu ida Bebonuk ne’e dezeñu ka Planta no Eadernu Enkargu (BoQ) iha hotu tiha ona, hein de’it implementasaun. Ita-boot sira hatene katak orsamentu foin aprova ne’ebé ita hein uitoan, ba oin. IX Governu sei haree. Tanba ne’e, tama ona orsamentu 2024 nian, la’ós de’it Bebonuk maibé estrada sa’e ba Manleuana no fatin seluk ne’e tama ona prioridade tinan ne’e,” nia hateten ba jornalista sira iha uma fukun PN, kuarta ne’e.
Deputada PD, Rozenha Martins, foti preokupasaun estrada diresaun Perumnas, Bairru Pite to’o iha Ailok-Laran. Estrada ne’e rasik populasaun hosi aldeia ualu mak asesu ne’ebé ho kondisaun ne’ebé aat.
Estrada ne’e la tuir estandar kapitál Dili nian no tinan barak ona la hetan atensaun husi Governu, tanba tuir informasaun ne’ebé hetan mandatu hosi VIII Governu Konstitusionál nian, estrada nia dezeñu prontu ona maibé to’o agora seidauk implementa, nune’e husu MOP atu haree tau atensaun.
Deputadu FRETILIN, Antonio Calau, sekunda mós estrada sira iha Dili laran identifika hanesan iha terminal Tasi-Tolu ba Masilidun ne’e grave tebes, inklui suku Fatuhada no estrada sa’e ba Hera, nune’e husu Governu atu tau atensaun.
Jornalista : Nelson de Sousa
Editór : Cancio Ximenes
