DILI, 10 janeiru 2024 (TATOLI) – Pasiente Aida da Costa Pinto, husu ba Ministériu Saúde (MS) atu rezolve urjente estoke ai-moruk ne’ebé mamuk iha fasilidade saúde hotu ne’ebé fó impaktu ba pasiente sira.
“Ha’u husu ba Ministériu Saúde atu rezolve lalais ai-moruk ne’ebé mak estoke mamuk atu labele fó impaktu ba ami-nia saúde”, Aida da Costa Pinto hateten iha HNGV, ohin.
Aida hanesan vítima ba ai-moruk mamuk iha Hospital Nasionál Guidu Valadares (HNGV), dehan ospitál estatal mak la iha ai-moruk mak fó impaktu ba pasiente sira no médiku sira halo reseita hafoin pasiente sira ba hola ai-moruk iha klínika privada.
“Ha’u moras anemia, ne’ebé ha’u foin mai konsulta hotu tiha, doutór sira fó reseita ba ha’u hodi ba foti aim-moruk iha farmasia HNGV, maibé to’o iha farmasia, infermeiru sira dehan ai-moruk la iha. No sira fó reseita mai ha’u atu bah ola ai-moruk iha klínika privada”, nia konta.
Hatan ba preokupasaun ne’e, Ministra Saúde, Elia dos Reis Amaral, hateten Empreza Sali-Magu sei hatama ai-moruk iha loron 15 to’o 20 fulan ida-ne’e hodi rezolve estoke ai-moruk iha fasilidade saúde iha territóriu nasionál.
“Ho preokupasaun ne’ebé mak iha fasilidade saúde hotu kona-ba ai-moruk mak kompania hatama ai-moruk iha loron 15 to’o 20 fulan ne’e ho item hamutuk 88 hodi rezolve estoke ai-moruk iha ita-nia rain”, Ministra Elia konklui.
Jornalista : Felicidade Ximenes
Editór : Zezito Silva
