Reprezentante povu husu MOP konklui projetu eletrisidade iha aldeia Simohei-Ermera

DILI, 10 janeiru 2024 (TATOLI)—Reprezentante povu iha uma fukun Parlamentu Nasionál (PN) liuhosi Deputadu KHUNTO, António Verdiál de Sousa, rekomenda ba Ministériu Obra Públika (MOP) atu tau atensaun hodi konklui projetu eletrisidade iha aldeia Simohei, suku Hatolia Vila, postu administrativu Hatolia A, munisípiu Ermera.
“Ko’alia kona-ba eletrisidade iha aldeia Simohei, ne’ebé daudaun ne´e hein hela mak ai-riin eletrisidade hirak ne´ebé harii hosi kompañia AIROMA UNIPESOAL, Lda, dezde tinan 2017 to´o ohin loron seidauk asesu ba enerjia eletrsidade, tanba ladauk isntala fiu ba ai-riin eletrisidade hirak ne´e,” Reprezentante povu ne’e hato’o iha uma fukun PN, tersa ne’e.
Liuhosi kontaktu eleitorál ne’ebé hala’o iha baze, Deputadu Verdiál hateten, nune´e mós iha sorin seluk populasaun iha suku Katrai-kraik kompostu hosi aldeia sia (9) iha postu Letefoho, munisípiu Ermera mak daudaun ne´e mós aldeia neen (6) asesu ona ba enerjia elétrisidade, ne´ebé harii hosi kompañia UNIKAL UNIP, LDA ne’ebé komesa hosi 2014-2017.
Maibé, nia dehan, falta aldeia tolu (3) hanesan Mausorumata, Kolkoli no Hatukeo ne´ebé baliza entre postu Hatu-Builiko, munisípiu Ainaro, sei nafatin nakukun iha naroman nia klaran, hodi sente katak ukun rasik aan ne’e seidauk partense ba sira, maske fatin refere sai mós fatin estratéjiku ba funu-na’in sira iha tempu invazaun Indonézia.
Iha parte seluk, nota mós kondisaun estrada no ponte hosi aldeia Lumutou, suku Katrai-Leten, postu Letefoho aat hodi difikulta komunidade asesu ba merkadu no eskola, tanba ponte ne´ebe ladauk halo no mota refere lori ona populasaun kuaze na’in 22 maks ai vítima.
Ba iha área saúde mak iha aldeia Baulisuria, Manukoliria no Hatu-Lete iha suku Katrai-kraik, postu Letefoho, munisípiu Ermera, kada tinan númeru mortalidade ba bebé no inan isin-rua aumenta ba beibeik.
Tanba, nia kauza mai hosi sentru saúde ne´ebé dook tebes iha mota sorin no susar iha tempu udan sira labele ultrapasa bee-mota ne’ebé boot, tanba ne´e husu Ministériu Saúde atu tau atensaun mós ba problema hirak ne´e.
Jornalista : Nelson de Sousa
Editór : Cancio Ximenes

