BNCTL halo ona pagamentu ikus ba benefisiáriu bolsa méritu 1.600-resin
DILI, 11 janeiru 2024 (TATOLI) – Banku Nasionál Komérsiu Timor-Leste (BNCTL) halo ona pagamentu ikus ba benefisiáriu bolsa méritu 1.646 iha 18 novembru 2023 ho montante $931.400 no balansu saldo ne’ebé iha banku ho totál millaun $2,4 haruka fali ba kofre Estadu iha 27 dezembru bazeia ba pedidu husi Ministériu Finansa (MF).
“Pagamentu bolsa méritu ba tinan 2023 ikus ona ba estudante 1.646. Ami simu pedidu husi MF iha 27 de dezembru 2023 ne’ebé husu atu banku tenke devolve fali saldo ne’ebé maka iha konta bolsa méritu nian ba kofre Estadu. Ne’ebé ho responsabilidade tomak ami devolve balansu husi konta bolsa méritu ho montante millaun $2,4”, Xefe Divizaun Tezouru BNCTL, Joaquim Martins, hatete ba Tatoli, iha Mandarin, ohin.
Prosesu pagamentu ne’ebé maka banku halo ona ba benefisiáriu bolsa méritu iha territóriu ne’ebé hetan mellór klasifikasaun iha kada eskola sira ne’e nia dadus mai husi Ministériu Edukasaun (ME). Molok atu halo transferénsia osan ba konta estudante nian, banku tenke halo uluk ezersísiu boot ida hodi halo verifikasaun ba dadus alunu sira-nian ne’ebé Edukasaun submete mai BNCTL, nune’e bele halo identifikasaun karik iha dadus ruma mak laloos bele haruka fali ba ME hodi hadi’a.
“Pagamentu ne’ebé ita atu halo ba benefisiáriu bolsa méritu sira ne’e tenke pakote. Kuandu dadus ne’ebé ita simu mai mak depois halo verifikasaun balun la prienxe rekizitu, ita tenke husu fali ME atu hadi’a, kuandu loos hotu ona maka ita foin selu dala ida”, dehan.
Pagamentu bolsa méritu ba tinan 2023 nian finaliza ona no ba 2024 nian bainhira sei iha BNCTL prontu nafatin atu koopera ho ME hodi kontinua realiza programa refere.
Benefisiáriu bolsa méritu Pedro da Cruz Mesquita husi Eskola Bázika Sentrál Farol haktuir katak nia haten ona pagamentu ho montante $458, tanba nia tama iha klasifikasaun kuartu lugar no osan sira ne’ebé maka nia hetan daudaun ne’e uza ba nesesidade eskola nian.
Obrigadu barak ba Ministériu Edukasaun tanba fó ona motivasaun ba ami estudnate sira liuhusi programa bolsa méritu ne’e. Osan sira ne’ebé ha’u simu ne’e sei uza duni ba ha’u-nian presiza liuliu nesesidade eskola nian”, dehan.
Tuir dadus husi Ministériu Edukasaun, totál benefisiáriu bolsa méritu hamutuk 12.927.
Notísia relevante: Lista benefisiáriu bolsa méritu faze datoluk submete ona ba BNCTL
Jornalista: Tomé Amado
Editora: Maria Auxiliadora
