DILI, 11 janeiru 2024 (TATOLI) – Komandu Jerál PNTL lihosi Komandante Jerál Komisáriu Jerál Henrique da Costa liuhosi nian despaixu númeru 05/CG-PNTL/I/2024 nomeia no fó pose ba Superintendente Polísia Umbelina hodi lidera Komandu PNTL Manatutu.
Liuhosi despaixu Komandante Jerál Komisáriu Jerál Polísia Henrique da Costa númeru 525/CG-PNTL/I/2023 nomeia no fó pose ba Superintendente Xefe Polísia Agostinho Gomes troka Superintendente Xefe Polísia António Maria de Sá lidera fali Komandu PNTL Bobonaro.
Superintendente Xefe Polísia António de Sá hetan fiar hosi Komandu Komisáriu Jerál PNTL Henrique da Costa ho despaixu númeru 526/CG-PNTL/I/2023 hetan fiar hodi sai fali hanesan Xefe Gabinete ba Departamentu Unidade Apoia Servisu Komandu Jerál PNTL.
Komandante Jerál Komisáriu Jerál Henrique da Costa liuhosi nia despaixu númeru 385/CG-PNTL/I/2023 fó pose ba Superintendente Xefe Polísia Antóninho Mauluta sai Komandante PNTL Munisípiu Baucau.
Iha biban ne’e mós, Komandante Jerál Komisáriu Jerál Henrique da Costa liuhosi nia despaixu númeru 370/ CG-PNTL/I/2023 nomeia no fó pose ba Superintendente Polísia Ludgeiro Picancio Lay lidera Komandu PNTL Ermera.
Komandante Jerál Komisáriu Jerál Henrique da Costa liuhosi nia despaixu númeru 04/CG-PNTL/I/2024 nomeia no fó pose ba Superintendente Polísia António Rêgo Fernandes hodi lidera Komandu PNTL Viqueque hodi troka Superintendente Polísia João da Costa.
Komandante Jerál Komisáriu Jerál Henrique da Costa liuhosi nia despaixu númeru05/ CG-PNTL/I/2024 nomeia no fó pose ba Superintendente Polísia João da Costa lidera fali Komandu PNTL Lautém hodi troka Superintendente Polísia António Rêgo Fernandes.
Komisáriu Jerál Henrique da Costa liuhosi nia despaixu númeru 03/ CG-PNTL/I/2024 nomeia no fó pose ba Superintendente Polísia Paulino do Carmo lidera fali Komandante PNTL Munisípiu Liquiça hodi troka Superintendente Polísia Umbelina dos Santos.
Komisáriu Jerál Henrique da Costa liuhosi nia despaixu númeru 09/ CG-PNTL/I/2024 nomeia no fó pose ba Asistente Superintendente Domingos Grigorio Soares lidera Komandu PTL Munisípiu Manufahi hodi substitui Joni Viana tanba hetan fali kargu foun hodi reprezenta Komandu PNTL iha Institutu Defeza Nasionál (IDN).
Komandante Jerál Komisáriu Jerál Henrique da Costa liuhosi nia despaixu númeru 10/ CG-PNTL/I/2024 nomeia no fó pose ba Asistente Superintendente Luis da Silva lidera Komandu PNTL Ainaro hodi troka Superintendente Paulio Carmo ne’ebé antes asume kargu Komandante Munisípiu Ainaro.
Komandante Jerál Komisáriu Jerál Henrique da Costa liuhosi nia despaixu númeru 08/ CG-PNTL/I/2024 nomeia no fó pose ba Asistente Superintendente Carlito da Silva hanesan Xefe Gabinete Planeamentu Estratéjiku no Dezenvolvimentu Komandu Jerál PNTL.
Komandante Jerál Komisáriu Jerál Henrique da Costa liuhosi nia despaixu númeru 07/ CG-PNTL/I/2024 nomeia no fó pose ba Asistente Superintendente Augusto Tilman da Costa hanesan Xefe Gabinete Relasaun Kooperasaun Internasionál Komandu Jerál PNTL.
Iha intervensaun Komandante Jerál PNTL, Komisáriu Jerál Polísia Henrique da Costa husu ba ofisiál Superiór PNTL ne’ebé tenke asume duni responsablidade tuir saida mak hakerek ona iha despaixu laran.
“Ohin ita halo toma pose tanba ne’e husu atu señor komandante sira responsabliza ba kna’ar foun ne’ebé mak ita bo’ot sira simu. Tanba konfiansa no kna’ar ne’ebé mak fó ba ita bo’ot sira atu halo servisu”, Henrique da Costa hateten iha nia intervensaun hafoin fó pose ba ofisiál Superiór PNTL iha salaun enkontru Komandu Jerál PNTL Caicoli, kinta ne’e.
“La’os kna’ar ne’ebé fó ba ita bo’ot sira ne’e atu uza hodi manda de’it membru no ita bo’ot sira labele tún ba terenu hodi halo servisu ne’e lae, tanba atu garante servisu ne’ebé di’ak komandante sira tenke kria komunikasaun di’ak ho membru sira”, nia adianta.
Nia dehan, nomeasaun no rotasaun ne’e buat ida ne’ebé mak normál iha instituisaun Polísia Nasional Timor-Leste tanba ne’e nesesidade instituisaun.
Tanba ne’e, husu ba hothotu atu pesoál ajente seguransa Estadu Timor-Leste hothotu atu krumpre no buat sira ne’e halo tama nesesidade komandu nian.
Henrique da Costa hato’o kongratulasaun ba membru PNTL ne’ebé molok ne’e hetan ona konfiansa hodi halo servisu iha Komandu Munisípiu tanba maske ho difikuldade oioin maibé Komandante PNTL sesante sira halo sira-nian serviu hodi garante seguransa ba povu ho di’ak.
Komisáriu Jerál PNTL ne’e mós kongratula Komandante PNTL Munisípiu sira no membru PNTL iha tereitóriu nasionál tanba garante seguransa ho susesu iha seguransa ba natál 2023 no tinan foun 204.
Iha fatin hanesan, Superintendente Polísia Umbelina dos Santos agradese ba fiar ne’ebé komandu PNTL deposita ba nia hodi lidera fila fali Komandu PNTL Manatutu.
“Ha’u sei servisu hamutuk ho parte hotu atu garante seguransa iha Munisípiu Manatutu atu bele la’o hakmatek iha ambiente pás no dame”, nia konklui.
Jornalista: Natalino Costa
Editór : Zezito Silva
