DILI, 11 janeiru 2024 (TATOLI) – Komandante Jerál PNTL, Komisáriu Jerál Polísia Henrique da Costa, hateten Komandu PNTL, iha marsu, sei halo rekrutamentu ba membru foun polísia hamutuk 200.
“Tuir orsamentu ne’ebé ita koloka ka ita iha hodi halo rekrutamentu ba tinan ne’e mak ba de’it 200. Maibé karik Ministru Interiór Francisco Guterres kuandu prevé tán fali osan balun mak posibilidade ita sei halo rekrutamentu liuhosi númeru ne’ebé ita iha”, Henrique da Costa hateten iha nia intervensaun hafoin fó pose ba Ofisiál Superiór PNTL iha salaun enkontru Komandu Jerál PNTL Caicoli, kinta ne’e.
Henrique dehan, komandu deside hodi halo rekrutamentu ba ema 200 tanba haree ba kondisaun Komandu PNTL nian agora daudaun.
“Ita tenke haree mós ita-nia fasilidade no kondisaun sira hanesan sala ba Sentru Formasaun Polísia bele akomula ema, tanba ita labele rekruta ema liu fila fali ita-nian preparasaun. Ida-ne’e mak fatór ida ba rekrutamentu”, nia adianta.
“Ita mós sei haree didiak sira-nian kuríkulum no ba sira-nian treinamentu iha Sentru Formasaun atu ita-nia prosesu rekrutamentu bele la’o di’ak”, nia afirma.
Nia subliña, Komandu PNTL hahú instála ona komisaun rekrutamentu ba tinan ne’e. Komisaun ne’e mak sei haree liubá makanizmu rekrutamentu no oinsá halo komunikasaun ho Ministériu Interiór kona-ba prosesu tomak ba rekrutamentu membru PNTL foun tinan ne’e.
Jornalista: Natalino Costa
Editór : Zezito Silva
